प्रधानमन्त्री केपी शर्मा ओलीले राष्ट्रिय स्वतन्त्र पार्टीलाई लक्षित गर्दै नवगठित पार्टीहरू मुलुकमा अराजकता फैलाउन उद्यत रहेको टिप्पणी गरेका छन्।
शुक्रवार जनकपुरमा आयोजित मधेश प्रदेश प्रहरी कार्यालयको प्रशासनिक भवन उद्घाटन समारोहलाई सम्बोधन गर्दै प्रधानमन्त्री ओलीले केही पार्टीहरूले आफूलाई नयाँ भन्दै जनतामा भ्रम फैलाइरहेको दाबी गरे। उनले यसतर्फ नागरिक सचेत रहनुपर्ने आवश्यकता औंल्याए।
ओलीले मुलुकको शान्ति व्यवस्था खलबल्याउन र प्रतिगमनतर्फ लैजान केही तत्त्व सक्रिय रहेको आरोप लगाए। विगतका राजनीतिक घटनाहरूको स्मरण गर्दै उनले राजतन्त्र फर्काउने अभियानमा केही शक्ति लागिरहेको उल्लेख गरे।
“नेपाली नागरिकलाई सुखी र मुलुकलाई समृद्ध बनाउन ढिला भइसकेको छ,” ओलीले भने, “अब नयाँ ढंगले, नयाँ तरिकाले र नयाँ संकल्पका साथ अघि बढ्नुपर्छ। कानून र संवादबाट हुने कुरा जोरजुलुम गरेर गर्ने परिपाटी अन्त्य गर्नैपर्छ।”
प्रधानमन्त्री ओलीले अँध्यारा दिन फर्काउन केही तत्त्व सक्रिय रहेको र जनतालाई नयाँ शक्ति भनेर भ्रममा पार्ने प्रवृत्ति मौलाइरहेको भन्दै त्यसप्रति सचेत रहन आह्वान गरे।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
प्रतिक्रिया
सम्बन्धित खवर
