सम्पत्ति शुद्धीकरण सम्बन्धी मुद्दामा पक्राउ परेका पूर्वमन्त्री दीपक खड्कालाई सात दिन हिरासतमा राखेर अनुसन्धान गर्न अदालतले अनुमति दिएको छ। आज बिहान पक्राउ परेका कांग्रेस नेता खड्कालाई म्याद थपका लागि काठमाडौँ जिल्ला अदालतमा उपस्थित गराइएको थियो। अदालतले अनुसन्धानका लागि आवश्यक प्रक्रिया अझै बाँकी रहेको ठहर गर्दै सात दिनको म्याद थप गरेको हो। सम्पत्ति शुद्धीकरण अनुसन्धान विभागले खड्काको बयान आजदेखि सुरु गरिएको जानकारी दिँदै, प्रमाण संकलन, थप बयान तथा अन्य अनुसन्धानका काम बाँकी रहेकाले हिरासतमा राख्न अनुमति माग गरेको थियो। सम्पत्ति शुद्धीकरण (मनि लाउन्डरिङ) निवारण ऐन, २०६४ को दफा १७(४) अनुसार आजैदेखि लागू हुने गरी खड्कालाई सात दिन हिरासतमा राख्न अनुमति दिइएको हो।