नेकपा (एकीकृत समाजवादी) का अध्यक्ष तथा पूर्व प्रधानमन्त्री माधवकुमार नेपालले पतञ्जली जग्गा प्रकरणमा आफूलाई अन्यायपूर्वक मुद्दा हालिएको दाबी गरेका छन्।
शनिबार काठमाडौंमा आयोजित एक कार्यक्रममा उनले कानुनले हदबन्दीभन्दा बढी जग्गा राख्न दिन स्वीकृति दिने व्यवस्था रहेको भन्दै आफूले कुनै गलत कार्य नगरेको स्पष्ट पारे। उनले भने, “यो काम मन्त्रीपरिषद्बाट सर्वसम्मतिले निर्णय गरेर भएको हो, त्यसमा मेरो व्यक्तिगत गल्ती छैन।”
उनका अनुसार त्यतिबेलाको मन्त्रिपरिषद्मा तत्कालीन उपप्रधानमन्त्री विद्या भण्डारीदेखि नेता सुजाता कोइराला, शंकर पोखरेल, भीम रावल, मिनेन्द्र रिजाललगायतका मन्त्रीहरूको सहमति रहेको थियो।
नेपालले आरोप खारेज गर्दै भने, “माथि लागेको मुद्दामा चार वटा कुरा छन्—हदबन्दीभन्दा बढी जग्गा दिने, दिएको भन्दा बढी विक्री गर्न दिने, सरकारी सम्पत्ति हिनामिना गर्ने र त्यसबाट भ्रष्टाचार गर्ने। तर कानुनमा हदबन्दी छुटलाई नियमन गर्ने विशेष व्यवस्था छ। त्यसैले क्याबिनेटले गरेको निर्णय कानुनी रूपमा वैध छ।”
अध्यक्ष नेपालले आफूले राजनीतिक जीवनमा कहिल्यै व्यक्तिगत लाभका लागि गल्ती वा बदमासी नगरेको भन्दै आरोपहरू निराधार भएको टिप्पणी गरे।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
