गत असोज महिनामा देशभरका मालपोत कार्यालयहरूले घरजग्गा कारोबारबाट दुई अर्ब ७५ करोड ८५ लाख रुपैयाँभन्दा बढी राजस्व संकलन गरेका छन् । आन्दोलन र चाडपर्वका कारण कार्यालय सञ्चालनमा कठिनाइ रहे पनि राजस्व संकलनको दर सामान्य रहन सफल भएको भूमि व्यवस्थापन तथा अभिलेख विभागले जनाएको छ ।
गत भदौको जेनजी आन्दोलनका क्रममा दुई दर्जनभन्दा बढी मालपोत कार्यालयमा तोडफोड र आगजनी हुँदा पनि असोजमा उल्लेख्य कारोबार भएको विभागको विवरणमा उल्लेख छ ।
विभागका अनुसार असोज महिनामा सेवा कर २१ करोड ३० लाख, रजिष्ट्रेशन शुल्क एक अर्ब ४४ करोड १६ लाख र पुँजीगत लाभकर एक अर्ब ६ करोड रुपैयाँ संकलन भएको छ ।
मालपोत कार्यालय चाबहिलले सबैभन्दा बढी २७ करोड ४२ लाख राजस्व संकलन गरेको छ भने आन्दोलनका क्रममा क्षति पुगेको कलङ्की मालपोतले पनि ४१ लाख रुपैयाँभन्दा बढी राजस्व उठाएको छ । त्यसैगरी, बुटवल, दमक र मनमैजु मालपोत कार्यालयहरूले क्रमशः पाँच करोड, दुई करोड ८६ लाख र चार करोड ७७ लाख राजस्व संकलन गरेका छन् ।
गत असोज महिनामा देशभर २३ हजारभन्दा बढी लिखत पारित भएका छन् । त्यस्तै, ७९ हजार ७ सयभन्दा बढी घरजग्गा सम्बन्धी कारोबार दर्ता भएका छन् ।
विभागका अधिकारीहरूका अनुसार कार्यालयहरूको अवस्था सामान्य बन्दै गएसँगै आगामी महिनामा राजस्व संकलन दर अझ बढ्ने अपेक्षा गरिएको छ ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
