नेकपा (एकीकृत समाजवादी) ले वाम एकताको प्रस्तावमा ठोस निर्णय गर्न कात्तिक १२ गते केन्द्रीय कमिटी बैठक आह्वान गरेको छ। हाल विभिन्न वामपन्थी, कम्युनिस्ट र समाजवादी दलबीच जारी एकता–संवादलाई निष्कर्षमा पुर्याउने उद्देश्यले बैठक बोलाइएको पार्टीले जनाएको छ।
बैठकमा एकतापछिको संगठनात्मक संरचना, सैद्धान्तिक धारणा र नेताहरूको व्यवस्थापनबारे विस्तृत छलफल हुने बताइएको छ। पार्टीका स्रोतका अनुसार बैठकले एकीकृत समाजवादीको आगामी राजनीतिक दिशा र वाम शक्तिहरूसँगको सहकार्यको रूपरेखा पनि तय गर्नेछ।
अहिले वामपन्थी एकता फेरि चर्चा केन्द्रमा आएको बेला एकीकृत समाजवादीको बैठकले सम्भावित गठबन्धन र पार्टी एकीकरण प्रक्रियालाई तीव्रता दिने संकेत गरेको छ।
पार्टीका शीर्ष नेताहरूले वामपन्थी शक्तिहरूबीच सहमति र विश्वास कायम गर्न संवाद निरन्तर चलिरहेको बताउँदै एकता “जनताको अपेक्षा अनुसारको वैचारिक एकता” हुनुपर्ने बताएका छन्।
बैठकपछि पार्टीले औपचारिक रूपमा वाम एकता प्रगतिबारे वक्तव्य जारी गर्ने तयारी गरेको बुझिएको छ।
