प्रधानमन्त्री सुशीला कार्की र नेपालका लागि चिनियाँ राजदूत छन सोङबीच आज सिंहदरबारमा बिदाइ भेटवार्ता भएको छ। आफ्नो कार्यकाल समाप्त गरी स्वदेश फर्किन लागेका राजदूत सोङले प्रधानमन्त्रीसँग शिष्टाचार भेट गरेका हुन्।
भेटका क्रममा नेपाल–चीन सम्बन्धका विभिन्न पक्ष, आपसी सहयोग र साझा हितका विषयमा छलफल भएको प्रधानमन्त्रीको सचिवालयले जनाएको छ। राजदूत सोङले चीन नेपालका लागि नजिकको मित्र राष्ट्र भएको उल्लेख गर्दै विकास निर्माणका विविध क्षेत्रमा चीनले निरन्तर सहयोग गर्दै आएको बताए। उनले भविष्यमा पनि यो सहयोग यथावत् रहने विश्वास व्यक्त गरे।
प्रधानमन्त्री कार्कीले राजदूत सोङले आफ्नो कार्यकाल सफलतापूर्वक पूरा गरेकोमा बधाई दिँदै उनको आगामी यात्राको सफलताको कामना गरिन्। साथै उनले नेपाल एक–चीन नीतिप्रति दृढ रूपमा प्रतिबद्ध रहेको र नेपालको भूमिबाट चीनको राष्ट्रिय हितविपरीत कुनै पनि गतिविधि हुन नदिने स्पष्ट प्रतिबद्धता व्यक्त गरिन्।
प्रधानमन्त्रीले चीनबाट विगतझैँ आगामी दिनमा पनि नेपालको विकास निर्माणमा साथ, समर्थन र सहयोग निरन्तर प्राप्त हुने अपेक्षा रहेको कुरा समेत राखिन्।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
प्रतिक्रिया
सम्बन्धित खवर
