आगामी फागुन २१ गते हुने प्रतिनिधिसभा सदस्य निर्वाचनका लागि आवश्यक सम्पूर्ण मतपत्र छपाइ सम्पन्न भएको छ। जनक शिक्षा सामग्री केन्द्र लिमिटेड का प्रबन्ध निर्देशक यदुनाथ पौडेल ले निर्वाचन आयोगले दिएको जिम्मेवारी सोमबार साँझ पूरा गरिएको जानकारी दिए।
उनका अनुसार आजदेखि सबै मतपत्र प्याकेजिङ गरी सम्बन्धित प्रदेशमा ढुवानी गरिनेछ। प्रत्यक्षतर्फ दुई करोड तीन लाख मतपत्र छपाइ सोमबार साँझ सम्पन्न गरिएको उनले बताए। ४२ दिनको कार्यतालिका लिएर सुरु गरिएको छपाइ ४० दिनमै सम्पन्न भएको जानकारी उनले दिए। अब १० दिनभित्र सबै जिल्लामा मतपत्र पुर्याइने उनले बताए।
केन्द्रले दैनिक १३ देखि १५ लाखसम्म मतपत्र छपाइ गर्दै आएको थियो। यसअघि १० लाख नमूना मतपत्र छपाइ गरी विभिन्न स्थानमा पठाइसकिएको छ। समानुपातिकतर्फका दुई करोड आठ लाख ३० हजार मतपत्र पनि जिल्लामा पठाउने काम भइरहेको केन्द्रले जनाएको छ।
प्रबन्ध निर्देशक पौडेलका अनुसार कर्णाली र सुदूरपश्चिम प्रदेशमा सबै मतपत्र पुगिसकेको छ। बाँकी क्षेत्रमा पनि १० दिनभित्र मतपत्र पुर्याउने गरी काम भइरहेको उनले जानकारी दिए।
