प्रधानमन्त्री सुशीला कार्कीले आगामी निर्वाचन तयारी र राजनीतिक समन्वयका विषयमा आज प्रमुख राजनीतिक दलका नेताहरूसँग महत्वपूर्ण छलफल गर्न लागेकी छन्।
प्रधानमन्त्री निवास बालुवाटारमा आज अपराह्न ४ बजे हुने छलफलमा नेपाली कांग्रेस, एमाले, माओवादी केन्द्र, राप्रपा, रास्वपा र जसपाका शीर्ष नेताहरुलाई आमन्त्रण गरिएको स्रोतले जनाएको छ।
फागुन २१ गते आम निर्वाचन गर्ने सरकारको घोषणापछि पनि राजनीतिक वातावरण पूर्ण रूपमा तयार नभएको दलहरूको भनाइका बीच प्रधानमन्त्री कार्कीको यो बैठकलाई निर्णायक मानिएको छ। निर्वाचन सुरक्षादेखि उम्मेदवार मनोनयनको मापदण्ड, आचारसंहिता कार्यान्वयन र निर्वाचन खर्चको पारदर्शितासम्मका विषय छलफलको एजेन्डामा छन्।
यसअघि राष्ट्रपति रामचन्द्र पौडेलको उपस्थितिमा दलका शीर्ष नेताहरूबीच प्रारम्भिक संवाद भएको थियो। आजको छलफलले त्यस संवादलाई ठोस निर्णयतर्फ लैजाने अपेक्षा गरिएको छ।
सरकारले स्थिरता र सुशासनको वातावरणमा निष्पक्ष निर्वाचन गराउने प्रतिबद्धता दोहोर्याउँदै प्रधानमन्त्री कार्कीले सबै दलको सहकार्य अपरिहार्य रहेको बताउँदै आएकी छन्।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
