राष्ट्रपति रामचन्द्र पौडेलले १३औँ संस्करणको किन्डर ओलम्पिकको मस्कट औपचारिक रूपमा सार्वजनिक गरेका छन् । राष्ट्रपति भवन शीतल निवासमा शुक्रबार आयोजित विशेष कार्यक्रममा मस्कट अनावरण गर्दै उनले किन्डर ओलम्पिकको टर्च नेपाल विद्यालय खेलकुद महासंघका अध्यक्ष विनोद श्रेष्ठलाई हस्तान्तरण गरे ।
कार्यक्रममार्फत राष्ट्रपतिले बालबालिकाको खेलकुद विकास र प्रतिभा अभिवृद्धिमा किन्डर ओलम्पिकको भूमिकालाई महत्वपूर्ण भन्दै यस्ता प्रतियोगिताले विद्यार्थीहरूमा अनुशासन, सहयोग र स्वस्थ प्रतिस्पर्धाको भावना विकास गराउने बताए ।
नेपाल विद्यालय खेलकुद महासंघका अनुसार १३औँ किन्डर ओलम्पिक पुस १२ गतेदेखि १५ गतेसम्म काठमाडौंस्थित दशरथ रंगशालामा आयोजना हुँदैछ । प्रतियोगितामा देशभरका विद्यालयका विद्यार्थी खेलाडीहरू सहभागी हुनेछन् ।
किन्डर ओलम्पिकअन्तर्गत एथलेटिक्ससहित विभिन्न १२ खेल विधामा प्रतिस्पर्धा हुने महासंघले जानकारी दिएको छ । बालखेलाडीहरूका लागि सुरक्षित र प्रोत्साहनमूलक वातावरणमा आयोजना हुने यस ओलम्पिकले विद्यालयस्तरको खेलकुदलाई थप सशक्त बनाउने अपेक्षा गरिएको छ ।
महासंघले किन्डर ओलम्पिकमार्फत सानै उमेरदेखि खेलकुद संस्कृतिको विकास गर्दै भावी राष्ट्रिय खेलाडी उत्पादनमा योगदान पुग्ने विश्वास व्यक्त गरेको छ ।
