नेकपा (एमाले) का अध्यक्ष तथा पूर्व प्रधानमन्त्री केपी शर्मा ओलीले फागुन २१ गते हुने निर्वाचन बिथोल्ने प्रयास भइरहेको भन्दै त्यस्ता सबै कसरत निस्तेज पार्नुपर्ने बताएका छन्।
एमाले निर्धारित समयमै निर्वाचन गरिनुपर्ने पक्षमा रहेको उल्लेख गर्दै ओलीले पार्टी सुरुदेखि नै निष्पक्ष र भयरहित निर्वाचनको पक्षमा अडान राख्दै आएको बताए। विभिन्न बहानाबाजी गर्दै देशलाई अराजकतातर्फ धकेल्ने र सामाजिक सहिष्णुतामा असर पार्ने गतिविधि भइरहेको भन्दै उनले निर्वाचन भाँड्ने षडयन्त्र हुन सक्ने आशंका व्यक्त गरे।
झापा क्षेत्र नम्बर ५ का प्रतिनिधिसभा सदस्य उम्मेदवारसमेत रहेका ओलीले आइतबार दमकमा आयोजित कार्यक्रममा बोल्दै सरकार, राजनीतिक दल र उम्मेदवारले निर्वाचनका लागि गरेको तयारी र लगानी खेर जान दिन नहुने बताए।
“जस्तोसुकै परिस्थिति आए पनि निर्वाचन रोकिनु हुँदैन,” ओलीले भने, “सरकार यसमा गम्भीर बन्नुपर्छ र निर्वाचनलाई निष्पक्ष तथा भयरहित बनाउन आवश्यक कदम चाल्नुपर्छ।”
एमाले कुनै अलमल नगरी निर्वाचनको पक्षमा उभिने र यसपटक सबैभन्दा ठूलो राजनीतिक शक्तिका रूपमा उदाउने दाबी पनि उनले गरे।
