प्रधानमन्त्री सुशीला कार्कीले जिल्ला प्रशासन कार्यालय, काठमाडौँमा सुरु गरिएको सेवा प्रवाहको नवीनतम मोडेलको निरीक्षण गरेकी छन्।
सोमबार बबरमहलस्थित प्रशासन कार्यालय पुगेर प्रधानमन्त्री कार्कीले सुशासन प्रवर्द्धनको लागि सुरु भएको सेवा प्रवाहको नवीनतम मोडेल, पब्लिक अनाउन्समेन्ट सिस्टम (सार्वजनिक सम्बोधन प्रणाली) सहितको समग्र प्रणालीको निरीक्षण गरी जानकारी लिएकी हुन्।
प्रधानमन्त्री कार्कीले नयाँ प्रणालीबाट नागरिकलाई सहज सेवा प्रवाह उपलब्ध हुने विश्वास व्यक्त गरिन्।
त्यस्तै, नयाँ प्रणालीमार्फत कार्यालय व्यवस्थापनमा भइरहेको गतिविधिको जानकारी पनि लिएको काठमाडौँका प्रमुख जिल्ला अधिकारी ईश्वरराज पौडेलले बताए। उनले नयाँ प्रणालीले सेवाग्राहीको समय बचत हुने र सहज रूपमा सेवा लिन सकिने पनि बताए।
पौडेलका अनुसार सेवा प्रवाहको नवीनतम मोडेल अन्य सरकारी सेवा प्रदायक निकायमा समेत विस्तार गर्न सकिने सम्भावना रहेको छ। निरीक्षणमा प्रधानमन्त्री कार्कीसँगै गृहमन्त्री ओमप्रकाश अर्याल पनि सहभागी थिए।
