नेकपा माओवादीका महासचिव नेत्रविक्रम चन्द ‘विप्लव’ ले विद्यार्थी संगठन खारेज गर्ने सरकारी नीतिविरुद्ध सुरु भएको आन्दोलनलाई समर्थन जनाएका छन्।

उनले विद्यार्थी संगठनहरूलाई आन्दोलनलाई अझ सशक्त बनाउँदै अघि बढ्न आग्रह गरेका छन्।

विप्लवले सरकारको यस्तो सोचलाई निरङ्कुश प्रवृत्तिको अभिव्यक्ति भएको बताएका छन्। उनका अनुसार विद्यार्थी संगठनहरू सचेतता, खबरदारी, न्याय, विद्रोह र अग्रगमनका प्रमुख वाहक हुन्।

उनले नेपालमा भएका परिवर्तनहरूमा विद्यार्थीहरूको महत्वपूर्ण भूमिका रहेको उल्लेख गर्दै इतिहासमा निरङ्कुश शासकहरूको अन्त्यमा पनि विद्यार्थी अग्रपंक्तिमा रहेको दाबी गरे।

विप्लवले वर्तमान परिवर्तनमा योगदान पुर्‍याउने शक्तिमाथि नै हस्तक्षेप गर्न खोजिए कडा प्रतिरोध हुने चेतावनी दिएका छन्। उनले विद्यार्थी संगठनहरूको घाँटी निमोठ्ने प्रयास भए सरकारकै जरो उखेलेर फ्याँकिने बताएका छन्।