कुलिङ अफ पिरियड सम्बन्धी गडबडीमा प्रत्यक्ष जिम्मेवार ठहर गरिएका प्रतिनिधिसभा राज्य व्यवस्था समितिका सभापति रामहरि खतिवडाले पदबाट राजीनामा दिने तयारी गरेका छन्।
छानबिन विशेष समितिको प्रतिवेदनले खतिवडालाई समितिको काममा समन्वयको कमी र गम्भीर त्रुटिको मुख्य जिम्मेवार ठहर गरेको थियो। प्रतिवेदन अनुसार, सभापतिको हैसियतले मस्यौदा प्रतिवेदन समितिका सबै सदस्यसँग छलफल नगरी सीमित व्यक्तिहरूसँग मात्र अनौपचारिक बैठक गरेर २०८२ जेठ १३ मा प्रतिवेदन पठाइएको देखिएको छ। यसलाई सभापतिको ‘उत्तरदायीपूर्ण भूमिका नदेखिएको’ टिप्पणी गरिएको छ।
मंगलबारको प्रतिनिधिसभा बैठकमा बोल्नका लागि खतिवडाले सभामुखसँग समय मागेका छन्। बैठक सुरू हुनु अघि उनले सभामुख देवराज घिमिरे र कांग्रेसका प्रमुख सचेतक श्याम घिमिरेसँग भेट गरेका थिए।
छानबिन प्रतिवेदनले समितिका सचिव सुरजकुमार दुरालाई पनि जिम्मेवार ठहर गरेको छ। सचिवको हैसियतमा दुरा प्रारम्भदेखि नै प्रतिवेदन लेखन प्रक्रियामा संलग्न भए पनि आफ्नो परिभाषित जिम्मेवारी पूरा नगरेको प्रतिवेदनमा उल्लेख छ।
यसअघि प्रतिवेदनले अन्य कर्मचारीहरूको पदीय आचरणमा समेत प्रश्न उठाउँदै, सार्वजनिक रूपमा लबिइङ र समितिले पारित गरेको निर्णयको विपक्षमा देखिनु शोभनीय नभएको निष्कर्ष निकालेको थियो।
राजीनामा घोषणाबारे खतिवडाले मंगलबारको बैठकमै औपचारिक जानकारी दिने अनुमान गरिएको छ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
प्रतिक्रिया
सम्बन्धित खवर
