हालैको अविरल वर्षा र बाढीपहिरोले देशका मुख्य राजमार्गदेखि वैकल्पिक सडकसम्म ठूलो क्षति पुर्याएको छ । भौतिक पूर्वाधार तथा यातायात मन्त्रालयका अनुसार, असोज १८ देखि २० गतेसम्मको अविरल वर्षाले मात्र देशभरका सडक, पुल र बेलिब्रिजमा करिब १२ अर्ब ३८ करोड रुपैयाँ बराबरको क्षति पुर्याएको अनुमान गरिएको छ ।
मन्त्रालयका प्रारम्भिक मूल्यांकनअनुसार यस वर्षको मनसुनजन्य विपद्बाट क्षति भएका मुख्य राजमार्ग, स्थायी पुल र वैकल्पिक सडकहरूको पुनर्निर्माणका लागि मात्रै १० अर्ब ६८ करोड रुपैयाँ आवश्यक पर्नेछ । बाँकी १ अर्ब ७० करोड रुपैयाँ गत वर्षका अवशिष्ट पुनर्निर्माण काममा खर्च हुनेछ ।
ऊर्जा, जलस्रोत तथा सिँचाइ तथा भौतिक पूर्वाधार मन्त्री कुलमान घिसिङले सडक पुनःसञ्चालनलाई उच्च प्राथमिकतामा राखिएको जानकारी दिएका छन् । उनका अनुसार बाढीपहिरोले अवरुद्ध गरेका सडकमा अहिले निरन्तर रूपमा उपकरण र जनशक्ति परिचालन गरिएको छ । उनले थपे, “सडक पुनर्निर्माण र सञ्चालनमा कुनै ढिलाइ नहोस् भनेर मन्त्रालयले दैनिक अनुगमन गरिरहेको छ ।”
यस वर्ष सबैभन्दा बढी क्षति मेची राजमार्गमा पुगेको छ, जसको पुनर्निर्माणमा करिब डेढ अर्ब रुपैयाँ लाग्ने अनुमान छ । त्यस्तै, कोशी, हुलाकी, अरनिको, कान्ति, नारायणघाट–मुग्लिङ र मध्यपहाडी राजमार्गहरूमा समेत ठूला भासिने र पुल भाँचिने घटनाले झण्डै तीन अर्ब ७७ करोड रुपैयाँ बराबरको पुनर्निर्माण लागत देखिएको छ ।
सडकसँगै क्षति पुगेका १७ वटा स्थायी पुल पुनर्निर्माणमा मात्रै चार अर्ब ५२ करोड रुपैयाँ आवश्यक पर्नेछ । त्यस्तै, तत्काल सञ्चालनका लागि आवश्यक बेलिब्रिज निर्माण र मर्मतका लागि ८० करोड रुपैयाँ खर्च हुने अनुमान छ ।
वैकल्पिक सडक पुनर्निर्माणका लागि एक अर्ब ५९ करोड रुपैयाँ लाग्ने देखिएको छ । मन्त्रालयले अहिलेसम्मको क्षतिको प्रारम्भिक विवरण तयार पारिसकेको र अन्तिम मूल्यांकनपछि बजेट विनियोजनका लागि अर्थ मन्त्रालयमा सिफारिस पठाउने तयारी भइरहेको जनाएको छ ।
स्थानीय स्तरका निकायहरू पनि सडक मर्मतमा जुटेका छन् । मेचीदेखि मध्यपहाडीसम्मका धेरै ठाउँमा अहिले ‘सिंगल लेन’ सञ्चालन गरेर आवागमन सुचारु गरिएको छ । तर, प्राविधिकहरूका अनुसार, दीर्घकालीन पुनर्निर्माणमा अझै केही महिना लाग्नेछ ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
प्रतिक्रिया
सम्बन्धित खवर
