धौलागिरि सर्किट अन्तर्गतको प्रसिद्ध पदमार्ग हुँदै धम्पुस लेक तर्फ गइरहेका एक जर्मन पर्यटक र उनको गाइड शुक्रबार रातिदेखि सम्पर्कविहीन भएका छन्।
म्याग्दीको धौलागिरि पदमार्ग हुँदै मुस्ताङको थासाङ गाउँपालिका–१, धम्पुस लेकमा प्रवेश गरेपछि ३२ वर्षीय जर्मन नागरिक दामिनो डेल्फाप्लो र गाइड मिमा शुक्रबार राति साढे ९ बजेपछि सम्पर्क टुटेको जिल्ला प्रहरी कार्यालय मुस्ताङकी प्रहरी नायब उपरीक्षक (डीएसपी) छिरिङ किप्पा लामाले जानकारी दिइन्।
उनका अनुसार गाइडको मोबाइल फोन पनि अफ रहेको र दुवैजनासँग कुनै सम्पर्क स्थापित हुन नसकेपछि तत्काल खोजी कार्य सुरु गरिएको छ। “सम्पर्कविहीन भएको पुष्टि भएपछि हेलिकोप्टरमार्फत खोजी सुरु गरिएको छ,” डीएसपी लामाले भनिन्, “तर अहिलेसम्म कुनै अत्तोपत्तो लागेको छैन।”
सम्पर्कविहीन यात्रुहरू म्याग्दीको सीमाबाट मुस्ताङ प्रवेश गरेको पुष्टि भएपछि सेभेन समिट ट्रेक्सको सहयोगमा हेली एभरेस्ट कम्पनीले शुक्रबार रातिदेखि हवाई खोजी सञ्चालन गरेको हो।
तर खराब मौसम र हिमपातका कारण हवाई खोजीमा कठिनाइ भइरहेको बताइएको छ। प्रहरीले अब स्थलगत रूपमा खोजी टोली पठाउने तयारी गरेको छ।
धौलागिरि फन्कोमार्ग नेपालको साहसिक र कठिन पदमार्गमध्ये एक मानिन्छ। यो मार्ग म्याग्दी र मुस्ताङ हुँदै जाने भएकाले हिमपात र हिउँको जोखिम पनि रहन्छ। यही जोखिमपूर्ण र आकर्षक क्षेत्रको बीचमा पर्ने धम्पुस लेकमा वर्षेनी विदेशी पर्यटकहरू आउने गर्छन्।
स्थानीय बासिन्दाहरूका अनुसार हाल त्यस क्षेत्रमा हिउँ र चिसो हावा बढिरहेको छ। त्यसैले खोजी कार्यमा थप सतर्कता अपनाइँदैछ। प्रहरीले स्थानीय गाइड, ट्रेकिङ कम्पनी र मुस्ताङ प्रशासनसँग समन्वय गर्दै दुवै सम्पर्कविहीन व्यक्तिको अवस्थाबारे यथाशीघ्र जानकारी ल्याउने प्रयास भइरहेको जनाएको छ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
