प्रधानमन्त्री सुशीला कार्कीले कुनै भ्रममा नपरी निराशा अन्त्य गर्दै नयाँ र समृद्ध नेपाल निर्माणको अभियानमा एकजुट हुन सबै नेपालीलाई आग्रह गरेकी छन्।
तिहार, म्हं पूजा, नेपाल संवत् ११४६ र छठ पर्वका अवसरमा शुभकामना सन्देश जारी गर्दै उनले देशको वर्तमान चुनौतीलाई पार गर्दै शान्ति, सुशासन र समृद्धिको लक्ष्यतर्फ अघि बढ्ने समय आएको बताइन्।
प्रधानमन्त्री कार्कीले सन्देशमा भनिन्, “हामी नेपालीहरू कठिन परिस्थितिमा पनि एकताबद्ध भएर अघि बढ्ने परम्परासहितका छौं। अब भ्रम, निराशा र अन्धकारलाई अन्त्य गर्दै नयाँ नेपालको उज्यालो भविष्य निर्माणमा सबैले आफ्नो भूमिका निर्वाह गर्नुपर्छ।”
उनले छ महिनाभित्र स्थिर सरकार निर्माण र आगामी फागुन २१ गते स्वच्छ, निष्पक्ष र भयरहित वातावरणमा निर्वाचन सम्पन्न गर्ने प्रतिबद्धता दोहोर्याइन्। प्रधानमन्त्रीले राजनीतिक संवाद, स्थायित्व र सुशासनलाई सरकारको मुख्य प्राथमिकता भएको बताइन्।
सन्देशमा भनिएको छ, “भ्रष्टाचारविरुद्ध ठोस कदम चाल्ने, जेनजी आन्दोलनका क्रममा भएका घटनाहरूको निष्पक्ष छानबिन गर्ने र सुशासन स्थापनाका लागि ठोस परिणाम देखाउने हाम्रो जिम्मेवारी हो।”
प्रधानमन्त्री कार्कीले भदौको जेनजी आन्दोलनले देशमा नयाँ चेतना जगाएको बताउँदै त्यस आन्दोलनले जनताले सरकारसँग गरेको विश्वास र अपेक्षालाई पूरा गर्न सरकार प्रतिबद्ध रहेको उल्लेख गरिन्।
उनले समावेशी, पारदर्शी र उत्तरदायी शासनको मार्गमा अघि बढ्दै जेनजी पुस्ताको चाहना अनुसार सुशासन र विकासको आधार तयार भएको बताइन्।
दीपावली र अन्य पर्वको सन्दर्भमा उनले अन्धकारमाथि उज्यालो, निराशामाथि आशा र अन्यायमाथि न्यायको विजयका रूपमा यी पर्वहरूले नयाँ उत्साह र विश्वास जगाउने सन्देश दिनुपर्ने बताइन्।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
