सामाजिक सञ्जालमा गरेको एक स्टाटसले नेपाल प्रहरीका डीआईजी जयराज सापकोटालाई विभागीय कारबाहीको दायरामा पुर्याएको छ। तीन डीआईजीको सरुवाबारे असन्तुष्टि जनाउँदै फेसबुकमा टिप्पणी गरेपछि प्रहरी हेडक्वार्टरले उनलाई कारबाही प्रक्रिया अघि बढाएको हो।
डीआईजी सापकोटाको स्टाटस प्रहरी नियमावली २०७१, मिडिया नीति २०६० तथा आचार संहिता २०७७ विपरीत भएको ठहर गर्दै छानबिन सुरु गरिएको छ।
केही दिनअघि सरुवा सूचि सार्वजनिक भएपछि सापकोटाले फेसबुकमा ‘हम कभी नही सुध्रेङ्गे, नेपाल पुलिस डीआईजी पोस्टिङ’ भन्दै असन्तुष्टि पोखेका थिए। उनको यही अभिव्यक्तिलाई संगठनले अनुशासनविपरीत ठानेको छ।
प्रहरीका अनुसार सामाजिक सञ्जालमा सार्वजनिक पद, जिम्मेवारी र संगठनको कार्यप्रणालीबारे व्यक्तिगत टिप्पणी गर्नु नियमअनुसार निषेधित छ। त्यसैले उनीविरुद्ध विभागीय कारबाही अगाडि बढाइएको बताइएको छ।
