चालु आर्थिक वर्षको पहिलो तीन महिनामा स्वदेश भित्रिएको विप्रेषण (रेमिट्यान्स) रु पाँच खर्ब ५३ अर्ब ३१ करोड पुगेको छ। नेपाल राष्ट्र बैंकले सार्वजनिक गरेको विवरण अनुसार साउन महिनामा मात्र विप्रेषण २९ दशमलव ९ प्रतिशतले वृद्धि भई रु एक खर्ब ७७ अर्ब ४१ करोड पुगेको थियो।
भदौ महिनामा भने विप्रेषण ३३ दशमलव १ प्रतिशतले वृद्धि भई तीन खर्ब ५२ अर्ब ८ करोड पुगेको छ। अघिल्लो आर्थिक वर्षको यही अवधिसँग तुलना गर्दा अघिल्लो वर्षमा तीन महिनामा चार खर्ब ८ अर्ब ७७ करोड भित्रिएको थियो।
यस अवधिमा कूल वस्तु निर्यात ८९ दशमलव ६ प्रतिशतले बढेर रु ७२ अर्ब ७८ करोड पुगेको छ भने आयात १९ दशमलव ८ प्रतिशतले वृद्धि भई ४ खर्ब ६८ अर्ब ८ करोड कायम भएको छ। परिणामस्वरूप, समीक्षा अवधिमा कूल वस्तु व्यापार घाटा १२ दशमलव २ प्रतिशतले बढेर ३ खर्ब ९५ अर्ब ३० करोड पुगेको छ।
चालु आवको पहिलो त्रैमासमा चालु खाता २ खर्ब ३७ अर्ब ५९ करोड र शोधनान्तर २ खर्ब ६४ अर्ब तीन करोडले बचतमा रहेको छ। अघिल्लो आवको सोही अवधिमा चालु खाता १ खर्ब १५ अर्ब ३६ करोड र शोधनान्तर १ खर्ब ८४ अर्ब ९९ करोड रहेको तथ्यांकले देखाउँछ।
विश्लेषकहरूले पहिलो त्रैमासको यी तथ्यांकलाई अर्थतन्त्रका लागि सकारात्मक संकेतका रूपमा लिएका छन्, विशेष गरी रेमिट्यान्स र निर्यात वृद्धि आर्थिक गतिविधि र मुद्रा प्रवाहमा बल थप्ने देखिन्छ।
