देशभर जाडो बढ्दै जाँदा काठमाडौं उपत्यकामा पनि चिसोले प्रभाव देखाउन थालेको छ। मौसम पूर्वानुमान महाशाखाका अनुसार आइतबार बिहान काठमाडौंको न्यूनतम तापक्रम ५ डिग्री सेल्सियसमा झरेको छ, जुन यस वर्ष अहिलेसम्मकै सबैभन्दा कम हो।
महाशाखाले जनाएअनुसार पछिल्ला केही दिनदेखि तापक्रम निरन्तर घट्दो क्रममा छ। शनिबार काठमाडौंको न्यूनतम तापक्रम ५.३ डिग्री र शुक्रबार ५.४ डिग्री मापन गरिएको थियो। आगामी दिनहरूमा तापक्रम अझै घट्न सक्ने सम्भावना रहेको बताइएको छ।
देशभरका १७ स्थानको तापक्रम विवरणमध्ये जुम्ला सबैभन्दा चिसो क्षेत्र बनेको छ। आइतबार बिहान जुम्लाको न्यूनतम तापक्रम –२.१ डिग्री सेल्सियस मापन गरिएको छ। त्यहाँ अघिल्ला दुई दिन तापक्रम –४ डिग्रीसम्म झरेको थियो।
अन्य स्थानतर्फ हेर्दा डडेलधुरामा ६.१, ताप्लेजुङमा ६.४, दिपायलमा ७.२, वीरेन्द्रनगरमा ८.१, ओखलढुंगामा ८.२, पोखरा र धनकुटामा ९, धनगढीमा ९.५ तथा घोराहीमा ९.९ डिग्री सेल्सियस न्यूनतम तापक्रम रेकर्ड गरिएको छ।
इतिहासतर्फ फर्किँदा काठमाडौंमा हालसम्मकै सबैभन्दा कम तापक्रम सन् १९७८ जनवरी ११ मा मापन गरिएको थियो। सो दिन काठमाडौंको तापक्रम माइनस ३.५ डिग्री सेल्सियससम्म झरेको थियो।
मौसम पूर्वानुमान महाशाखाले हाल कुनै मौसमसम्बन्धी चेतावनी जारी गरेको छैन। देशमा पश्चिमी वायुको आंशिक प्रभाव रहेको र दैनिक रूपमा बिहान र बेलुका तापक्रमको विवरण सार्वजनिक गरिँदै आएको महाशाखाले जनाएको छ।
