ठगी तथा आपराधिक विश्वासघातको अभियोगमा फरार रहेका अर्जुनबहादुर शाहीलाई जिल्ला प्रहरी परिसर काठमाडौँले पक्राउ गरेको छ । मनसरी घलेसहितको जाहेरीका आधारमा शाहीलाई पक्राउ गरिएको प्रहरीले जनाएको छ ।
अछामको पञ्चदेव विनायक नगरपालिका–४ घर भई काठमाडौँको रानीपोखरी बस्ने २६ वर्षीय शाहीविरुद्ध ठगी, आपराधिक विश्वासघात र बैंकिङ कसुर (चेक अनादर) सम्बन्धी मुद्दा दर्ता रहेका छन् । प्रहरीका अनुसार शाहीमाथि विभिन्न मितिमा फरक–फरक मुद्दा दर्ता भएको पाइएको छ ।
शाही यसअघि पनि असोज २९ गते पक्राउ परेका थिए । त्यतिबेला उनले ‘जेन्जी’ को नाममा विभिन्न सरकारी कार्यालयमा धम्की दिएको आरोपमा कोटेश्वरबाट पक्राउ गरिएको थियो । त्यस समय पनि उनी विभिन्न आपराधिक मुद्दामा फरार रहेको प्रहरीको भनाइ छ ।
प्रहरीका अनुसार शाहीले नागरिक उड्डयन प्राधिकरणका महानिर्देशकलाई धम्की दिँदै राजीनामा मागेका थिए । बैंकिङ कसुर, वैदेशिक रोजगारी ठगीलगायतका मुद्दामा उनी फरार थिए ।
शाही जेन्जी रिभोलुसन नेपालका संयोजकसमेत रहेका छन् । केही दिनअघि पत्रकार सम्मेलन गर्दै उनले आफूलाई फसाउन र जेन्जी आन्दोलनको उपलब्धि हत्याउन षड्यन्त्र गरिएको दाबी गरेका थिए ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
प्रतिक्रिया
सम्बन्धित खवर
