संसदीय प्रतिस्पर्धात्मक राजनीतिमा आएपछि विभिन्न जिल्ला र क्षेत्र परिवर्तन गर्दै जित्दै आएका दाहालको यस पटक रुकुम पूर्व रोजाइमा परेको छ । नेकपाले जित्ने अरू क्षेत्रभन्दा तुलनात्मक रूपमा सुरक्षित रहेको रुकुम पूर्वमा २१ फागुनको संसदीय निर्वाचनका लागि उम्मेदवार हुने करिब पक्का भएको छ । २०६४ देखि माओवादी केन्द्रले रुकुम पूर्वबाट निरन्तर जित्दै आएको छ ।

सोमबार रुकुम पूर्वका नेताहरू पूर्ण घर्ती, तेजबहादुर ओलीलगायत नेताहरूले दाहाललाई भेटेर रुकुम पूर्वबाट उम्मेदवार हुन आग्रह गरेका थिए । रुकुम पूर्व जिल्ला समितिले दाहाललाई उम्मेदवारका रूपमा सिफारिस गरिसकेकाले उम्मेदवार हुन पुनः आग्रह गरेका थिए । त्यसबेला दाहालले रुकुम पूर्वबाट उम्मेदवार हुन ‘सकारात्मक’ भएको बताएका थिए । बिहीबार पनि केन्द्रीय कार्यालय पेरिसडाँडाबाट बाहिरिने क्रममा दाहालले रुकुम पूर्वबाट उम्मेदवार हुनेबारे शुक्रबारसम्म टुंगो लगाउने बताए । ‘भोलि (शुक्रबार) सम्म टुंगो लाग्छ’ उनको भनाइ थियो

दाहालले २०६४ को पहिलो संविधानसभामा काठमाडौं–१० र रोल्पा–२ बाट उम्मेदवार हुँदा ऐतिहासिक र राजनीतिक सम्बन्ध गहिरो भएकाले आएको बताएका थिए । ‘जनयुद्ध’ को आधार इलाकाको सम्मान गर्दै आफूले रोल्पा रोजेको उनले त्यतिबेला बताएका थिए । ‘रोल्पाली जनता महान् हुनुहुन्छ । म जनयुद्धकालमा दुई वर्ष यहीं सुरक्षित बसेको छु’ उनको भनाइ थियो ।

दाहाल ३७ वर्षदेखि पार्टीको प्रमुख नेतृत्वमा छन् । उनी २०६५, २०७३, २०७९ गरी तीन पटक प्रधानमन्त्री भइसकेका छन् । १० पुस २०७९ देखि ३१ असार २०८१, १९ असार २०७३ देखि २३ जेठ २०७४ सम्म र साउन २०६५ देखि जेठ २०६६ सम्म प्रधानमन्त्री भएका थिए । २६ मंसिर २०११ मा कास्कीको ढिकुरपोखरी–२ लेवाडेमा जन्मिएका दाहालको परिवार २०२५ सालमा चितवनको शिवनगरमा बसाइँ सरेको थियो ।