भएको छ। २१ फागुनमा सम्पन्न निर्वाचनका कारण यस वर्षको एसईई अघिल्लो तालिकाभन्दा १२ दिनपछि सारिएको हो। गत वर्ष भने परीक्षा चैत ७ गतेदेखि सुरु भएको थियो।

राष्ट्रिय परीक्षा बोर्डका अनुसार यस वर्ष करिब ५ लाख १० हजार विद्यार्थी एसईईमा सहभागी हुँदैछन्। गत वर्ष ५ लाख १४ हजार ७१ विद्यार्थी सहभागी भएकामा यस पटक करिब ४ हजार विद्यार्थी घटेका छन्। परीक्षा नियन्त्रक टुकराज अधिकारीका अनुसार सहभागीमध्ये ६३ हजार विद्यार्थी एक्जाम्टेड रहेका छन्। साथै, जापानबाट पनि २३ जना विद्यार्थीले एसईई दिने भएका छन्। कुल परीक्षार्थीमध्ये २ लाख ५७ हजार ५२७ छात्रा र २ लाख ५२ हजार ४३४ छात्र रहेका छन्।

परीक्षा सञ्चालनका लागि देशभर ७७ वटै जिल्लामा प्रश्नपत्र पुगिसकेको छ। बोर्डले १ हजार ९ सय ९१ परीक्षा केन्द्र निर्धारण गरेको जनाएको छ। प्रश्नपत्र र उत्तरपुस्तिका सबै जिल्ला प्रहरी कार्यालयमार्फत सुरक्षित रूपमा राखिएको छ। परीक्षा सुरक्षित र व्यवस्थित बनाउन नेपाल प्रहरीले देशभर करिब १२ हजार ५ सय सुरक्षाकर्मी परिचालन गर्नेछ।

परीक्षा चैत १९ गतेदेखि २९ गतेसम्म बिहान ८ बजेदेखि सञ्चालन हुनेछ। पहिलो दिन अनिवार्य अंग्रेजी विषयको परीक्षा हुनेछ भने २० चैतमा अनिवार्य नेपाली, २२ चैतमा अनिवार्य गणित र २३ चैतमा संस्कृति तथा वेद विद्याश्रमतर्फका विषयको परीक्षा हुने तालिका छ। त्यसैगरी २४ देखि २९ चैतसम्म प्राविधिक धारतर्फका पुरानो तथा नयाँ पाठ्यक्रममा आधारित विषयहरूको परीक्षा सञ्चालन गरिनेछ।

एसईई सम्पन्न भएलगत्तै देशका अधिकांश जिल्लामा शिक्षा विकास तथा समन्वय इकाइको समन्वयमा उत्तरपुस्तिका परीक्षण सुरु गरिने राष्ट्रिय परीक्षा बोर्डले जनाएको छ। बोर्डले वार्षिक क्यालेन्डरअनुसार परीक्षा सकिएको तीन महिनाभित्र नतिजा सार्वजनिक गर्ने तयारी गरेको छ। सोही अनुसार आगामी असारको तेस्रो साता एसईईको नतिजा प्रकाशन गर्ने लक्ष्य राखिएको छ।