नेकपा एमालेका महासचिव शंकर पोखरेलले जेनजी आन्दोलनका घटनाको छानबिनका लागि गठित कार्की आयोग निष्पक्ष नरहेको दाबी गरेका छन्।

बिहीबार बिहान सामाजिक सञ्जालमार्फत आफ्नो धारणा सार्वजनिक गर्दै उनले आयोगको प्रतिवेदनले नै यसको निष्पक्षतामाथि प्रश्न उठाएको बताएका छन्। उनले लेखेका छन्, “कार्की आयोग निष्पक्ष छानबिनका लागि बनेको होइन भन्ने धारणा आयोगको प्रतिवेदनले नै पुष्टि गरेको छ।”

पोखरेलले कार्की आयोग र आम निर्वाचन २०८२ लाई ‘अल्गोरिदम’मार्फत नेपाली समाजमा परेको प्रभावलाई राजनीतिक र कानूनी वैधानिकता दिने प्रयासका रूपमा व्याख्या गरेका छन्। उनले भनेका छन्, “कार्की आयोग र आम निर्वाचन ०८२ अल्गोरिदममार्फत नेपाली समाजमा परेको प्रभावलाई राजनीतिक र कानूनी वैधानिकता दिने प्रयास थियो भन्ने कुरा स्पष्ट छ। सोही अनुसारको निर्वाचनको परिणाम र आयोगको प्रतिवेदन आएको छ।”

उनका अनुसार निर्वाचन परिणाम र आयोगको प्रतिवेदनसँगै नेपाली राजनीति नयाँ मोडतर्फ अघि बढेको छ। उनले सामाजिक सञ्जालमा लेखेका छन्, “अल्गोरिदमको प्रयोगबाट लोकप्रियतावाद, अराजकतावाद र अवसरवादको मिश्रणबाट नयाँ शक्तिको उदय भएको छ। अबको बाटो सजिलो नहुन सक्छ— राष्ट्र र लोकतन्त्र दुवैले केही समय चुनौतीको सामना गर्नुपर्ने देखिन्छ।”

पोखरेलले यस्तो परिस्थितिमा ‘नयाँ शक्ति’ र ‘नेतृत्व’लाई उनीहरूको दृष्टिकोणअनुसार काम गर्ने अवसर दिनुपर्ने र जनतालाई प्रत्यक्ष अनुभवमार्फत मूल्यांकन गर्न दिनु उपयुक्त हुने उल्लेख गरेका छन्।

यद्यपि, उनले लोकप्रियतावाद, अराजकतावाद र अवसरवादलाई दीर्घकालीन समाधान वा विचारधारात्मक राजनीतिको विकल्पका रूपमा लिन नसकिने जिकिर पनि गरेका छन्।