नेकपा एमालेका कार्यकर्ताले अध्यक्ष केपी शर्मा ओलीलाई तत्काल रिहा गर्न माग गर्दै काठमाडौँको चावहिलमा प्रदर्शन गरेका छन्।

प्रदर्शनकारीहरूले “अध्यक्ष ओलीलाई रिहा गर”, “प्रतिशोधपूर्ण कारबाही मुर्दावाद”, “प्रहरीका हत्यारालाई कारबाही गर”, “सिंहदरबार जलाउनेलाई कारबाही गर”, “सहकारी ठगलाई कारबाही गर” जस्ता नारा लगाउँदै नाराबाजी गरेका छन्। यसैगरी देशका अन्य विभिन्न जिल्लामा पनि ओली पक्राउको विरोधमा एमाले कार्यकर्ताहरू सडकमा उत्रिएका छन्।

गत भदौ २३ गते भएको जेनजी आन्दोलनमा हिंसात्मक दमन गरेको आरोपमा बालेन नेतृत्वको सरकारले शनिबार बिहान तत्कालीन प्रधानमन्त्री ओली र गृहमन्त्री रमेश लेखकलाई घरबाटै पक्राउ गरेको थियो। भक्तपुरको गुण्डुस्थित निवासबाट पक्राउ परेका ओलीलाई काठमाडौँ जिल्ला प्रहरी परिसरबाट स्वास्थ्य परीक्षणका लागि महाराजगन्जस्थित त्रिवि शिक्षण (टिचिङ) अस्पताल पुर्‍याइएको थियो।

यसबीच, नेकपा एमालेकोआज बसेको सचिवालय बैठकमा पार्टीले तत्काल दुवै नेता रिहा गर्न माग गर्ने निर्णय गरेको छ। महासचिव शंकर पोखरेलले पत्रकारहरूसँग कुरा गर्दै सो निर्णयको जानकारी दिएका छन्।