माइतीघर मण्डलामा एमाले नेता महेश बस्नेतकी पत्नी अम्बिका र शोभा पाठकबीच झडप भएको छ । घटना आज दिउँसो करिब १२ बजेतिर भएको हो ।

सुधन गुरुङको पुनर्वहालीको माग गर्दै शोभा पाठक, रस्मिला धामीलगायतका युवतीहरू माइतीघरमा धर्नामा बसिरहेका थिए । सोही क्रममा अम्बिका आफ्ना समर्थकसहित त्यहाँ पुगेपछि विवाद चर्किएको प्रत्यक्षदर्शीले बताएका छन् ।

दुवै पक्षबीच भनाभन बढ्दै जाँदा घम्साघम्सीको अवस्था सिर्जना भएको थियो । स्थिति नियन्त्रण बाहिर जान थालेपछि प्रहरीले हस्तक्षेप गरी दुवैलाई छुट्याएको थियो ।

प्रहरीले अम्बिकासहित केही महिलालाई नियन्त्रणमा लिएर घटनास्थलबाट हटाएको जनाएको छ । घटनाबारे थप विवरण आउन बाँकी छ ।

शोभा पाठक यसअघि महेश बस्नेतमाथि कारबाहीको माग गर्दै अनशन बसेकी थिइन् । तत्कालीन गृहमन्त्री सुधन गुरुङ उनलाई भेट्न पुगेका थिए । गुरुङले राजीनामा दिएपछि पाठकले अनशन तोडेकी थिइन् । हाल उनी गुरुङको पुनर्वहालीको माग गर्दै धर्नामा बस्दै आएकी छन् ।