राष्ट्रिय स्वतन्त्र पार्टी (रास्वपा) का सभापति रवि लामिछानेले पूर्वगृहमन्त्री सुधन गुरुङमाथि छिट्टै छानबिन सुरु हुने बताएका छन् ।

बुधबार बसेको संसदीय दलको बैठकपछि सञ्चारकर्मीसँग कुरा गर्दै उनले गुरुङमाथि उठेका विषयहरूबारे छानबिन प्रक्रिया चाँडै अघि बढ्ने जानकारी दिएका हुन् ।

लामिछानेका अनुसार गुरुङले नै आफूविरुद्ध छानबिन गर्न आग्रह गरेका छन् । उनले छानबिन हुने निश्चित भए पनि कुन प्रक्रियाबाट अघि बढ्ने भन्ने विषय भने टुंगो लाग्न बाँकी रहेको बताए ।

‘छानबिनको प्रक्रिया चाँडै सुरु हुन्छ, कस्तो प्रकारको हुन्छ भन्नेबारे चाँडै जानकारी दिइन्छ,’ उनले भने, ‘उहाँले नैतिकता देखाउँदै आफूविरुद्ध उठेका प्रश्नका कारण छानबिन गरियोस् भन्नुभएको छ ।’

लामिछानेले विवादित व्यवसायी दीपक भट्टसँग अनुचित कारोबारको आरोप लागेपछि गुरुङले गृहमन्त्री पदबाट राजीनामा दिएको पनि उल्लेख गरे ।