त्रिभुवन विश्वविद्यालयले आगामी साउनदेखि नियमित शैक्षिक पात्रोअनुसार परीक्षा सञ्चालन गर्ने भएको छ। परीक्षा प्रणालीलाई व्यवस्थित र समयमै नतिजा निकाल्ने उद्देश्यसहित विश्वविद्यालयले शैक्षिक सुधारको प्रक्रिया तीव्र बनाएको हो।
परीक्षा नियन्त्रण कार्यालयले अनियमित रूपमा ढिलाइ भएका परीक्षाहरू धमाधम सञ्चालन गरिरहेको छ। कार्यालयका परीक्षा नियन्त्रक लक्ष्मण पौडेलका अनुसार शैक्षिक पात्रो सुधार्ने उद्देश्यले महिनामा तीनदेखि चार प्रकारका परीक्षा सञ्चालन भइरहेका छन्।
पौडेलका अनुसार २०५३ सालदेखि बाँकी रहेका पुराना मौका परीक्षाहरू समेत आगामी असारसम्म सम्पन्न गर्ने लक्ष्य राखिएको छ। त्यसपछि साउनदेखि नयाँ शैक्षिक सत्रअन्तर्गत नियमित परीक्षा प्रणाली लागू गरिनेछ।
हाल वैशाख महिनामै स्नातक तहअन्तर्गत बीएएलएलबी दोस्रो वर्ष, स्नातक तह नियमित दोस्रो वर्ष तथा बीटेक पहिलो र दोस्रो वर्षका परीक्षा सञ्चालन भइरहेका छन्।
असार महिनामा स्नातक तहका सबै संकायको चौथो वर्षको नियमित परीक्षा हुने तालिका तय गरिएको छ। हाल सञ्चालन भइरहेका परीक्षामा करिब एक लाख १५ हजार विद्यार्थी सहभागी भएका छन्।
परीक्षा नियन्त्रक पौडेलका अनुसार त्रिविले परीक्षाफल अधिकतम १०० दिनभित्र प्रकाशन गर्ने व्यवस्था पनि लागू गरिरहेको छ। साथै, ३० वर्षअघि छुटेका विद्यार्थीहरूलाई समेत मौका परीक्षा दिने अवसर प्रदान गर्ने तयारी गरिएको छ।
विश्वविद्यालयले पुरानो अव्यवस्थित परीक्षा प्रणालीलाई सुधार्दै शैक्षिक क्यालेन्डरलाई कडाइका साथ लागू गर्ने लक्ष्य राखेको जनाएको छ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
प्रतिक्रिया
सम्बन्धित खवर
