राष्ट्रिय परीक्षा बोर्डले माध्यमिक शिक्षा परीक्षा (एसइई)को नतिजा आजै सार्वजनिक गर्ने तयारी गरेको छ।

बोर्डले परीक्षाफल इन्ट्री तथा रुजु गर्ने काम सकिएको जनाएको छ। कुनै प्राविधिक गडबडी नभए सोमबार नै नतिजा सार्वजनिक गरिने तयारी भइरहेको बोर्डका अधिकारीहरूले बताएका छन्।

यसअघि नै बोर्डले वैशाख २९ गतेभित्र एसइईको नतिजा सार्वजनिक गर्ने जानकारी दिएको थियो। अहिले अन्तिम चरणको प्राविधिक तयारी भइरहेको जनाइएको छ।

बोर्डका एक उच्च अधिकारीका अनुसार सबै प्रक्रिया लगभग पूरा भइसकेको छ र प्रणाली परीक्षणको काम भइरहेको छ।

“कुनै प्राविधिक समस्या नआए आजै नतिजा सार्वजनिक हुन्छ,” ती अधिकारीले बताएका छन्।

यस वर्षको एसइई परीक्षाको नतिजा सार्वजनिक हुने प्रतीक्षामा देशभरका विद्यार्थी तथा अभिभावक रहेका छन्।