देशका विभिन्न क्षेत्रमा आज पनि मौसम बदली रहने भएको छ । मौसम पूर्वानुमान महाशाखाका अनुसार नेपालमा पश्चिमी वायु, स्थानीय वायु तथा पूर्वी भूभाग नजिक रहेको न्यून चापीय क्षेत्रको प्रभाव कायम रहेकाले वर्षा, हिमपात र तातो हावाको मिश्रित अवस्था देखिने भएको हो ।

महाशाखाका अनुसार अहिले बिहान कोशी प्रदेशसहित बागमती र गण्डकी प्रदेशका हिमाली तथा पहाडी भूभागमा सामान्यदेखि आंशिक बदली रहेको छ । कर्णाली र सुदूरपश्चिमका हिमाली क्षेत्रमा पनि बादल लागेको छ । मधेश प्रदेशसहित लुम्बिनीका पहाडी भूभागमा आंशिक बदली रहेको छ भने अधिकांश तराई क्षेत्रमा मौसम मुख्यतया सफा रहेको जनाएको छ ।

हाल कोशी र गण्डकी प्रदेशका केही स्थानमा मेघगर्जन र चट्याङसहित मध्यम वर्षा भइरहेको छ । बागमती प्रदेशका एक–दुई स्थानमा हल्का वर्षा भइरहेको मौसमविद्ले बताएका छन् ।

महाशाखाका अनुसार आज दिउँसो कोशी, बागमती र गण्डकी प्रदेशमा सामान्य बदली रहनेछ । ती प्रदेशका केही स्थानमा मेघगर्जन, चट्याङसहित मध्यम वर्षाको सम्भावना रहेको छ । साथै हिमाली क्षेत्रमा हल्का हिमपात पनि हुन सक्ने अनुमान गरिएको छ ।

मधेश प्रदेशसहित लुम्बिनी, कर्णाली र सुदूरपश्चिम प्रदेशका पहाडी तथा हिमाली भूभागका थोरै स्थानमा पनि वर्षाको सम्भावना रहेको मौसम महाशाखाले जनाएको छ ।

यता सुदूरपश्चिम र लुम्बिनी प्रदेशका पहाडी क्षेत्रमा तातो दिनको प्रभाव देखिन सक्ने जनाइएको छ । तराई भूभागमा तातो हावा तथा तातो लहर चल्ने सम्भावना रहेकाले आवश्यक सतर्कता अपनाउन मौसमविद्ले आग्रह गरेका छन् ।

आज राति पनि देशका अधिकांश हिमाली तथा पहाडी क्षेत्रमा बदली रहने अनुमान गरिएको छ । कोशी, बागमती र गण्डकी प्रदेशका केही स्थानमा राति पनि मेघगर्जनसहित वर्षा हुने सम्भावना छ । मधेश, लुम्बिनी, कर्णाली र सुदूरपश्चिमका पहाडी तथा हिमाली क्षेत्रका थोरै स्थानमा पनि वर्षा र हिमपात हुन सक्ने महाशाखाले जनाएको छ ।

मौसमविद्हरूले विशेषगरी हिमाली क्षेत्रमा यात्रा गर्ने, नदी आसपास बसोबास गर्ने तथा अत्यधिक गर्मी हुने क्षेत्रमा बस्ने नागरिकलाई सावधानी अपनाउन आग्रह गरेका छन् ।