वीरगञ्ज महानगरपालिकाका मेयर राजेशमान सिंहविरुद्ध पक्राउ पुर्जी जारी भएको छ। पर्सा जिल्ला अदालतले लिखत किर्ते सम्बन्धी कसुरमा उनीविरुद्ध पक्राउ अनुमति दिएको हो।

अदालतका तहसिलदार देवराज भट्टराईले मेयर सिंहलाई पक्राउ गर्न अदालतबाट अनुमति जारी भएको पुष्टि गरेका छन्। उनका अनुसार उक्त अनुमति गत जेठ ८ गते नै जारी गरिएको थियो।

जिल्ला प्रहरी कार्यालय पर्साका डीएसपी हरिबहादुर बस्नेतले पनि अदालतले मेयर सिंहविरुद्ध नागरिकता सम्बन्धी लिखत कसुरमा पक्राउ गर्न अनुमति दिएको जानकारी दिए।

प्रहरीका अनुसार अदालतको आदेशपछि आवश्यक कानुनी प्रक्रिया अगाडि बढाइएको छ।

वीरगञ्ज महानगरपालिकाका प्रमुखसमेत रहेका सिंहविरुद्ध पक्राउ पुर्जी जारी भएपछि स्थानीय राजनीतिक वृत्तमा समेत चासो बढेको छ।