फिफा विश्वकप २०२६ को सहआयोजक राष्ट्र मेक्सिको जारी प्रतियोगिताको नकआउट चरणमा प्रवेश गर्ने पहिलो टोली बनेको छ।

शुक्रबार बिहान भएको समूह ‘ए’ अन्तर्गतको खेलमा दक्षिण कोरियालाई १–० गोलअन्तरले पराजित गर्दै मेक्सिकोले एक खेल बाँकी रहँदै अन्तिम १६ मा स्थान सुरक्षित गरेको हो।

ग्वाडलाजारा स्टेडियममा सम्पन्न खेलमा मेक्सिकोका लागि लुइस लोरोले ५०औँ मिनेटमा गरेको एकमात्र गोल नै निर्णायक बन्यो। उक्त गोलसँगै मेक्सिकोले महत्वपूर्ण तीन अंक हात पार्न सफल भयो।

यस जितसँगै मेक्सिकोले दुई खेलबाट ६ अंक जोड्दै समूहको शीर्ष स्थान कायम राखेको छ। यसअघि पहिलो खेलमा उसले दक्षिण अफ्रिकालाई २–० गोलले पराजित गरेको थियो।

मेक्सिकोले अब समूह चरणको अन्तिम खेलमा चेक रिपब्लिकसँग प्रतिस्पर्धा गर्नेछ।

पराजित दक्षिण कोरियाको भने नकआउट चरण पुग्ने सम्भावना अझै बाँकी छ। पहिलो खेलमा चेक रिपब्लिकलाई २–१ गोलले हराएको दक्षिण कोरियासँग हाल ३ अंक छ।

समूहका अन्य टोली दक्षिण अफ्रिका र चेक रिपब्लिकले एक–एक अंक जोडेका छन्। दुवै टोलीको एक खेल बाँकी रहेकाले उनीहरूको पनि नकआउट चरण प्रवेशको सम्भावना जीवित रहेको छ।

मेक्सिको सन् २०१८ को विश्वकपमा अन्तिम १६ सम्म पुगेको थियो। तर सन् २०२२ को विश्वकपमा भने समूह चरणबाटै बाहिरिएको थियो। यसपटक घरेलु समर्थकको साथमा उसले उत्कृष्ट सुरुआत गर्दै नकआउट चरणको यात्रा तय गरेको छ।