सत्तारुढ राष्ट्रिय स्वतन्त्र पार्टी (रास्वपा)ले १८ वर्षमुनिका बालबालिकालाई पार्टी सदस्य बनाएको विषयमा नेपाली कांग्रेसले प्रतिनिधिसभामा प्रश्न उठाएको छ।

आइतबार प्रतिनिधिसभा बैठक सुरु हुनेबित्तिकै कांग्रेस सांसद रेनुका काउँचाले रास्वपाको हालै सम्पन्न प्रथम महाधिवेशनमा सार्वजनिक भएको सदस्यता विवरणप्रति सभामुखको ध्यानाकर्षण गराइन्।

उनले महाधिवेशनमा सार्वजनिक गरिएको तथ्यांकअनुसार १८ वर्षभन्दा कम उमेरका ३५ हजारभन्दा बढी बालबालिका रास्वपाको सदस्य रहेको देखिएको बताइन्।

काउँचाले नेपालको संविधानले बालबालिकालाई राजनीतिक दलको सदस्य बनाउन नदिने व्यवस्था गरेको उल्लेख गर्दै १८ वर्षमुनिका बालबालिकालाई पार्टी सदस्य बनाउने र राजनीतिक गतिविधिमा सहभागी गराए ८० हजार रुपैयाँ जरिवाना र तीन वर्षसम्म कैद हुने कानुनी व्यवस्था रहेको स्मरण गराइन्।

‘के रास्वपा संविधानभन्दा माथि हो?’ भन्दै उनले सरकारसँग जवाफ मागिन्।

उनले कुनै पनि बालबालिकालाई राजनीतिक उद्देश्यका लागि प्रयोग गर्न नपाइने संवैधानिक तथा कानुनी व्यवस्थाको पालना गराउन सरकारको ध्यानाकर्षण पनि गराइन्।

कांग्रेस सांसद काउँचाले बालबालिकाको मतको आधारमा रास्वपामा धेरै नेता निर्वाचित भएको दाबी गर्दै विद्यार्थीले राजनीति गर्न नहुने भन्दै स्वतन्त्र विद्यार्थी युनियन (स्ववियु) खारेज गर्ने तयारी गरिरहेको सरकारले यस विषयमा पनि स्पष्ट धारणा दिनुपर्ने बताइन्।

प्रतिनिधिसभाको बैठक सुरु हुनासाथ राप्रपाका सांसद ज्ञानेन्द्र शाहीबाहेक विपक्षी दलका सांसदहरूले उठेर विरोध जनाएका थिए। त्यसपछि सभामुख डीपी अर्यालले विपक्षी सांसदहरूलाई आफ्नो धारणा राख्न समय दिएका थिए।