अर्थमन्त्री स्वर्णिम वाग्लेले पेट्रोलियम पदार्थको मूल्य अब घट्ने बताएका छन्। प्रतिनिधिसभाको आइतबारको बैठकमा बोल्दै उनले मध्यपूर्वमा देखिएको तनाव कम हुँदै गएकाले इन्धनको मूल्य पनि क्रमशः घट्ने बताए।
अर्थमन्त्री वाग्लेले मध्यपूर्वमा उत्पन्न समस्याका कारण अन्तर्राष्ट्रिय बजारमा इन्धनको मूल्य बढ्दा त्यसको असर नेपाली उपभोक्तामाथि पनि परेको उल्लेख गरे।
उनले आफू अर्थमन्त्री बनेको दुई साताभित्रै पेट्रोल, डिजेल र मट्टितेलको आयातमा लाग्ने भन्सार महसुल तथा पेट्रोल र डिजेलमा लाग्ने पूर्वाधार विकास करको ५० प्रतिशत छुट दिने निर्णय गरिएको जानकारी दिए।
‘मध्यपूर्वमा देखिएको समस्याका कारण इन्धनको मूल्य बढ्दा उपभोक्तामाथि परेको भार कम गर्न हामीले भन्सार महसुल र पूर्वाधार विकास करमा ५० प्रतिशत छुट दिएका थियौं,’ उनले भने।
अहिले मध्यपूर्वको अवस्था विस्तारै सहज बन्दै गएको भन्दै वाग्लेले नेपालले भारतीय आयल निगममार्फत इन्धन आयात गर्ने भएकाले त्यसको प्रभाव नेपालमा देखिन केही समय लाग्ने बताए।
‘भारतीय आयल निगममार्फत आउने मूल्य समायोजन हुन केही समय लाग्छ,’ उनले भने, ‘अब पेट्रोलियम पदार्थको मूल्य घट्नेवाला छ।’
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
