राष्ट्रिय स्वतन्त्र पार्टी (रास्वपा) का सभापति रवि लामिछानेले वर्तमान सरकारको नियतमाथि कुनै शंका नगर्न आग्रह गरेका छन्।

शनिबार सिंहदरबारस्थित रास्वपा संसदीय दलको कार्यालयमा रौतहटका विभिन्न दलबाट आएका कार्यकर्तालाई पार्टीमा स्वागत गर्दै उनले सरकारको नियत स्पष्ट रहेको बताएका हुन्।

लामिछानेले सरकारका केही निर्णयमा विवाद वा समस्या आउन सक्ने भए पनि त्यसलाई आवश्यकताअनुसार सच्याउन सकिने बताए।

उनले भने, ‘सरकारको नियतमा कुनै पनि शंका छैन। निर्णयहरूमा कहिलेकाहीँ समस्याहरू आउन सक्छन्। त्यसलाई करेक्सन गर्न सकिन्छ। नियत खराब भयो भने कहाँ करेक्सन गर्ने? नियत करेक्सन गर्न गाह्रो हुन्छ। निर्णय गर्दा दुई–चार वटा निर्णयले विवाद ल्याउन सक्छ।’

उनले सरकारका निर्णयको प्रभाव व्यवहारमा देखिन र त्यसको मूल्यांकन गर्न केही समय लाग्ने उल्लेख गर्दै तत्काल निष्कर्षमा नपुग्न आग्रह गरे।

सरकारले अघि बढाएका निर्णयहरूको परिणाम देखिन समय लाग्ने भएकाले केही समय धैर्यता अपनाउनुपर्ने उनको भनाइ थियो।