प्रशासनले साउन ११ गते बिहान ७ बजेदेखि अर्को सूचना जारी नभएसम्म लागू हुने गरी जिल्लाका पाँच मुख्य बजार क्षेत्रलाई केन्द्रित गरेर कर्फ्यु आदेश जारी गरेको हो।

कर्फ्यु हरिनगर बजार क्षेत्रमा पनि लागू गरिएको छ। यस क्षेत्रमा पूर्वतर्फ नुनियतोल, पश्चिमतर्फ पश्चिम खुनिया धार, उत्तरतर्फ हरिनगर गाउँपालिका कार्यालय र दक्षिणतर्फ वसन्तपुर मोडसम्मको क्षेत्र कर्फ्युको दायरामा परेको छ।

त्यसैगरी, भुटाहा बजार, कप्तानगञ्ज बजार र घुस्की बजार क्षेत्रमा पनि कर्फ्यु आदेश लागू गरिएको छ। भुटाहा बजारमा पूर्वतर्फ मोरिया धार खोला, पश्चिमतर्फ इदगाह फिल्ड, उत्तरतर्फ सुनसरी खोला र दक्षिणतर्फ हरिनगर गाउँपालिका कार्यालयसम्मको क्षेत्र कर्फ्युभित्र परेको छ।

कप्तानगञ्ज बजार क्षेत्रमा पूर्वमा यादव टोल, पश्चिममा सिमल माध्यमिक विद्यालय, उत्तरमा कृष्ण माध्यमिक विद्यालय र दक्षिणमा नेपाल–भारत सीमा क्षेत्रसम्म कर्फ्यु लागू गरिएको छ।

यस्तै, घुस्की बजारमा पूर्वतर्फ कासमिया मदरसा, पश्चिमतर्फ प्रहरी चौकी घुस्की, उत्तरतर्फ इशा हार्डवेयर र दक्षिणतर्फ हिलाल पब्लिक स्कुलसम्मको क्षेत्रमा कर्फ्यु आदेश जारी गरिएको छ।

प्रमुख जिल्ला अधिकारी वासुदेव घिमिरेका अनुसार देवानगञ्ज बजार क्षेत्रमा पनि कर्फ्यु लागू गरिएको छ। यस क्षेत्रको पूर्वमा विराटनगर जाने बाटोको मुसहर टोल, पश्चिममा मोरिया खोला, उत्तरमा चिउरा मिल र दक्षिणमा गाउँपालिका कार्यालयसम्मको क्षेत्र कर्फ्युको दायरामा परेको छ।

प्रशासनले सुरक्षा अवस्थालाई मध्यनजर गर्दै अर्को सूचना जारी नभएसम्म कर्फ्यु आदेश पालना गर्न सबैलाई आग्रह गरेको छ।