निर्वाचन आयोगका प्रस्तावित दुई निर्वाचन आयुक्तको संसदीय सुनुवाइ आज हुने भएको छ।

संसदीय सुनुवाइ समितिको बैठक बिहान ११:१५ बजे सिंहदरबारमा बस्नेछ। बैठकमा निर्वाचन आयुक्तका लागि प्रस्तावित गुरुप्रसाद वाग्ले (ओखलढुंगा) र डा. राजीव सुब्बा (काठमाडौं) को सुनुवाइ गर्ने कार्यसूची रहेको छ।

संवैधानिक परिषद्को असार १९ गते बसेको बैठकले प्रमुख निर्वाचन आयुक्तमा मानबहादुर कार्की तथा निर्वाचन आयुक्तमा गुरुप्रसाद वाग्ले र डा. राजीव सुब्बाको नाम सिफारिस गरेको थियो।

संसदीय सुनुवाइ समितिबाट सुनुवाइ प्रक्रिया पूरा भएपछि प्रमुख निर्वाचन आयुक्त र निर्वाचन आयुक्तलाई राष्ट्रपतिले नियुक्त गर्ने संवैधानिक व्यवस्था छ।

यसअघि समितिले प्रस्तावित प्रमुख निर्वाचन आयुक्त र आयुक्तविरुद्ध उजुरी आह्वान गरेको थियो। प्रमुख निर्वाचन आयुक्तविरुद्ध एउटा उजुरी परेको समितिले जनाएको छ।

समितिले बुधबार उजुरीकर्तासँग छलफल गर्ने र त्यसपछि प्रमुख निर्वाचन आयुक्तको सुनुवाइ गर्ने तयारी गरेको छ।