जेनजी आन्दोलनका क्रममा सार्वजनिक सम्पत्तिमा आगजनी, तोडफोड, प्रहरीका हतियार लुटपाट तथा विभिन्न हिंसात्मक गतिविधिमा संलग्न भएको आरोपमा एक हजार १३ जना पक्राउ परेका छन् । पक्राउ परेकामध्ये २४९ जना अहिले पनि कारागारमा छन् ।
जेनजी प्रदर्शनको एक वर्ष पूरा हुँदा प्रहरी प्रधान कार्यालयका अनुसार भदौ २३ र २४ गते भएका हिंसात्मक घटनासम्बन्धी विभिन्न कसुरमा एक हजार १३ वटा मुद्दा दर्ता भएका थिए । तीमध्ये ७८५ वटा मुद्दा फर्छ्योट भइसकेका छन् भने २२८ वटा मुद्दाको कानुनी प्रक्रिया पूरा हुन बाँकी छ ।
हिंसात्मक गतिविधिमा संलग्न भएको आरोपमा पक्राउ परेकामध्ये सुरुको अदालतको आदेशबाट २७३ जना पुर्पक्षका लागि जेल चलान भएका थिए । २२ जना साधारण तारेखमा, ४९४ जना धरौटीमा र २२४ जना हाजिरी जमानीमा छुटेका छन् । पुर्पक्षमा जेल गएकामध्ये दोस्रो तहको अदालतबाट केही छुटिसकेका छन् ।
प्रहरीका केन्द्रीय प्रवक्ता डीआईजी अभिनारायण काफ्लेका अनुसार हाल २४९ जना कारागारमा रहेका छन् ।
भदौ २३ र २४ गतेको प्रदर्शनका क्रममा आपराधिक उपद्रव, अभद्र व्यवहार, चोरी तथा डाँका चोरी, ज्यानसम्बन्धी कसुर, हातहतियार तथा खरखजाना, ज्यान मार्ने उद्योग, विद्युतीय कसुर तथा साइबर अपराध र कारागार ऐनसम्बन्धी कसुरमा मुद्दा दर्ता गरी अनुसन्धान गरिएको प्रहरीले जनाएको छ ।
भदौ २४ गते प्रदर्शनका क्रममा देशभर सरकारी कार्यालय तथा निजी सम्पत्तिमा आगजनी र तोडफोड भएको थियो । संसद् भवन, सिंहदरबार, बालुवाटार र सर्वोच्च अदालतलगायतका सरकारी संरचनामा समेत आगजनी भएको थियो । विभिन्न स्थानमा प्रहरी कार्यालयमा पनि आगजनी हुनुका साथै हतियार लुटिएका थिए ।
प्रहरीको तथ्यांकअनुसार व्यक्तिको निजी सम्पत्ति तथा सरकारी निवासबाहेक १४३ वटा प्रहरी कार्यालय जलाएर नष्ट भएका थिए भने ३१६ वटा कार्यालयमा आंशिक क्षति पुगेको थियो । हालसम्म ८ वटा प्रहरी कार्यालयबाट काम सुरु हुन सकेको छैन भने २५१ वटा कार्यालय निर्माणाधीन अवस्थामा छन् ।
जेनजी प्रदर्शनका क्रममा कारागारबाट भागेका १४ हजार ५५५ जनामध्ये १० हजार ६९४ जनालाई प्रहरीले पुनः पक्राउ गरी कारागार फर्काएको जनाएको छ ।
जेनजी आन्दोलनपछि तत्कालीन प्रधानमन्त्री केपी शर्मा ओली नेतृत्वको सरकार ढलेको थियो । त्यसपछि गत फागुनमा भएको संघीय संसद्को निर्वाचनमा राष्ट्रिय स्वतन्त्र पार्टीका नेता वालेन्द्र शाहको नेतृत्वमा सरकार बनेको थियो ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
