नेकपा एमालेकी पूर्वउपाध्यक्ष तथा पूर्वराष्ट्रपति विद्यादेवी भण्डारीले पार्टी राजनीतिमा आफ्नो सक्रियता रोक्न सक्ने कुनै पनि शक्ति नरहेको स्पष्ट पारेकी छन्। सोमबार विराटनगर पुगेर भण्डारीले ३ दशकभन्दा लामो समय पार्टीमा योगदान दिएकी आफूलाई पुनः सक्रिय राजनीतिमा आउनबाट कसैले रोक्न नसक्ने बताइन्।
पूर्वराष्ट्रपतिले राष्ट्रपतिको कार्यकाल सकिएपछि पनि आफूले एमाले सदस्यता नवीकरण गरेको र आफ्नो अधिकार कसैले खोस्न नसक्ने बताइन्। उनले पार्टीमा कुनै गुट नचलाउने प्रतिबद्धता व्यक्त गर्दै आफू एमालेकै कार्यकर्ता रहेको र पार्टीको औपचारिक निर्णयबारे आफूलाई जानकारी नभएको पनि स्पष्ट पारेकी छन्।
त्यसैगरी, केही समयअघि कांग्रेस नेता डा. शेखर कोइरालासँग निवास भंगालमा भेट भएको विषयमा प्रश्न उठेपछि भण्डारीले पुराना मित्रको हैसियतले भेट भएको र छलफल सकारात्मक रहेको बताइन्। उनले भनिन्, “देशका शिक्षा, स्वास्थ्य, सुशासन र रोजगारीका विषयमा नेताहरूबीच छलफल हुनु सकारात्मक कुरा हो।”
विद्यादेवी भण्डारीको यो अभिव्यक्तिले आगामी पार्टी भित्रको गतिविधि र राजनीतिक सक्रियतामा उनको भूमिकाको संकेत दिएको देखिन्छ।
