उपराष्ट्रपति रामसहायप्रसाद यादव र भियतनामकी उपराष्ट्रपति भो थी आन सुआनबिचबीच आइतबार सम्पन्न प्रतिनिधिमण्डलस्तरीय भेटवार्ताले नेपाल–भियतनाम सम्बन्धलाई नयाँ अध्यायतर्फ डोर्याएको छ।
नेपाल भ्रमणमा रहेकी उपराष्ट्रपति सुआनबिचसँग उपराष्ट्रपति यादवले हवाई सेवा, पर्यटन प्रवर्द्धन, लगानी र सूचना प्रविधि लगायतका विषयमा गहन छलफल गर्नुभयो। बैठकमा सिधा हवाई उडान सुरु गर्ने, व्यापार–लगानी सम्झौता अगाडि बढाउने र डिजिटल प्रविधिमा सहकार्य गर्ने विषयमा विशेष जोड दिइएको थियो।
परराष्ट्र मन्त्रालयका प्रवक्ता लोकबहादुर पौडेल क्षेत्रीका अनुसार, यो भ्रमण नेपाल–भियतनामबीचको कूटनीतिक सम्बन्ध स्थापनाको ५०औँ वार्षिकोत्सवका अवसरमा विशेष महत्व बोकेको छ। उहाँका अनुसार भियतनाम बौद्ध धर्मावलम्बी राष्ट्र भएकाले लुम्बिनी भ्रमणलाई सहज बनाउन दुवै पक्षबीच सिधा उडानबारे सहमति खोजिएको हो।
भियतनामको प्रतिनिधिमण्डलले व्यापार र लगानी सम्झौता चाँडै सम्पन्न गर्नुपर्नेमा जोड दिएको छ। भेटवार्तामा जनता–जनता, व्यवसायी–व्यवसायी र सरकार–सरकारबीचको सम्बन्ध अझ प्रगाढ बनाउने तथा अन्तर्राष्ट्रिय मञ्चमा साझा धारणा बनाउँदै अघि बढ्ने सहमति पनि भएको छ।
यसैक्रममा प्रधानमन्त्री केपी शर्मा ओलीले पनि भियतनामकी उपराष्ट्रपति सुआनबिचसँग सिंहदरबारमा भेटवार्ता गर्नुभयो। दुबै नेताबीच समस्यारहित सम्बन्धलाई अझ प्रगाढ बनाउन, कूटनीतिक र सांस्कृतिक सम्बन्ध बलियो बनाउने विषयमा छलफल भएको थियो।
नेपाल–भियतनाम कूटनीतिक सम्बन्ध स्थापनाको ५०औँ वार्षिकोत्सवका अवसरमा आइतबार विशेष समारोहसमेत सम्पन्न भएको छ। भ्रमणका क्रममा उपराष्ट्रपति सुआनबिचले राष्ट्रपति रामचन्द्र पौडेलसँग शिष्टाचार भेट गर्ने र पाटन दरबार स्क्वायर, स्वयम्भूनाथ लगायतका सम्पदास्थल अवलोकन गरी सोमबार स्वदेश फर्किने कार्यक्रम रहेको छ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
प्रतिक्रिया
सम्बन्धित खवर
