काठमाडौं महानगरपालिकाका मेयर बालेन्द्र साह (बालेन) र ‘हामी नेपाल’ संस्थापक सुदन गुरुङविरुद्ध नयाँ जाहेरी परेको छ। बुधबार युवराज पौडेल ‘सफल’ले हुलाकमार्फत जिल्ला प्रहरी परिसर काठमाडौंमा उक्त जाहेरी पेश गरेका हुन्। परिसर स्रोतका अनुसार जाहेरी अहिले प्रहरी परिसरमा पुगेको छ।
जाहेरीमा मुलुकी अपराध संहिता, २०७४ को दफा ५०(१) अन्तर्गत ‘राजद्रोह सम्बन्धी कसुर’मा अनुसन्धानको माग गरिएको छ। यसअघि मंगलबार मात्र नेकपा एमाले निकट विद्यार्थी संगठन अनेरास्ववियुका पूर्व अध्यक्ष समीक बडाल नेतृत्वको समूहले पनि बालेन र सुदनविरुद्ध प्रहरीमा जाहेरी दिएका थिए।
हाल दुवै जाहेरी दर्ता भइसकेका छैनन्। प्रहरीका अनुसार अनेरास्ववियुको टोलीलाई २४ घण्टाभित्र सरकारी वकिलसँग परामर्श गरेर निर्णय गरिने जानकारी दिइएको थियो।
युवराज सफलले आफूले पठाएको जाहेरी भोलिसम्म दर्ता हुने विश्वास व्यक्त गरेका छन्। प्रहरी स्रोतले दुवै जाहेरी जेन–जी आन्दोलनका घटनाको छानबिन गर्न गठन गरिएको पूर्वन्यायाधीश गौरीबहादुर कार्की नेतृत्वको तीन सदस्यीय जाँचबुझ आयोगमा पठाउने तयारी गरेको पनि जनाएका छन्।
जाहेरीको प्रकृया पूरा भएपछि अनुसन्धानका लागि आवश्यक कारबाही अघि बढाइने प्रहरी अधिकारीहरूले जानकारी दिएका छन्। यससँगै बालेन र सुदनविरुद्धको कानुनी प्रक्रिया थप जटिल बन्दै गएको छ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
प्रतिक्रिया
सम्बन्धित खवर
