संचारमन्त्री जगदीश खरेलले लगाएको रोलेक्स ब्रान्डको घडी सामाजिक सञ्जालमा अहिले व्यापक रूपमा चर्चा भइरहेको छ। उक्त घडीको मूल्य नेपालमा करिब ६५ देखि ७५ लाख रुपैयाँसम्म पर्ने अनुमान छ। तर बजारमा यस मोडेलका धेरै नक्कली संस्करणहरू पनि पाइने भएकाले वास्तविक मूल्यबारे विभिन्न अड्कलबाजी भइरहेका छन् भने संचारमन्त्री जगदीश खरेलले यस बारे प्र्तिकिर्या दिएका छैनन् , सो घडी रोलेक्स ब्रान्डकै हो वा होईन भन्ने यकिन भएको छैन ।
घडीको विषयमा भइरहेको चर्चा बीच सरकार गठन भएको एक महिना नाघिसक्दा पनि प्रधानमन्त्री र मन्त्रीहरूको सम्पत्ति विवरण भने अझै सार्वजनिक हुन सकेको छैन। सुशासन र पारदर्शिताको प्रतिज्ञा गर्दै बनेको यो सरकारको ढिलासुस्तीले जनस्तरमा प्रश्न उठाएको छ।
भ्रष्टाचार निवारण ऐन, २०५९ को दफा ५० अनुसार, सार्वजनिक पद धारण गर्ने व्यक्तिले पदभार ग्रहण गरेको ६० दिनभित्र आफ्नो वा परिवारको सम्पत्ति विवरण तोकिएको निकायमा बुझाउनुपर्ने कानुनी व्यवस्था छ। तर प्रधानमन्त्रीदेखि मन्त्रीहरूसम्मले अझै विवरण बुझाएको वा सार्वजनिक गरेको पुष्टि हुन सकेको छैन।
