तिहारको पाँचौँ दिन आज देशभर गाई पूजाको उल्लास छ । कार्तिक शुक्ल प्रतिपदाका दिनलाई यमपञ्चकको महत्वपूर्ण दिन मान्दै हिन्दू धर्मावलम्बीहरूले गाईलाई पवित्र माता मानी पूजा गरी मीठा परिकार अर्पण गर्दै मनाइरहेका छन् ।
वैदिक परम्पराअनुसार गाईलाई धन, पवित्रता र मातृत्वको प्रतीक मानिन्छ । गाईको दूध आमाको दूधजत्तिकै पौष्टिक हुने धार्मिक विश्वास रहँदै आएको छ । त्यसैले आजका दिन गाईको पूजा गरी शुद्धता र समृद्धिको कामना गरिन्छ ।
धर्मशास्त्रविद्हरूका अनुसार कार्तिक कृष्ण औँसीपछि अर्थात् प्रतिपदाका दिन गाई पूजा गर्नुपर्ने शास्त्रीय विधि हो । केही ठाउँमा भने औँसीकै दिन पूजा गर्ने परम्परा पनि प्रचलित छ ।
गाईलाई गौमाता मानी सम्मान गर्ने परम्परा प्राचीन कालदेखि चल्दै आएको हो । गाईका दूध, गहुँत र गोबरलाई शुद्धता र ऊर्जाको स्रोतका रूपमा पनि मानिन्छ ।
धार्मिक विश्वासअनुसार, साउन पूर्णिमामा बाँधिएको राखी आज गाईको पुच्छरमा बाँधिदिँदा मृत्युपश्चात् गाईले वैतरणी नदी पार गरिदिने बताइन्छ । गाई पूजाको यो संस्कारलाई श्रद्धा र आस्थाका साथ मनाउनेहरू बिहानैदेखि पूजा सामग्री लिएर व्यस्त देखिएका छन् ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
