काठमाडौं महानगरपालिकाले आइतबार थापाथली क्षेत्रका नक्साविनाका संरचनामाथि डोजर चलाउँदै अतिक्रमण हटाएको छ।
महानगरको वडा नम्बर ११ अन्तर्गत थापाथली चोकबाट त्रिपुरेश्वरतर्फ जाने मोडमा वर्षौंदेखि बनेका अवैध संरचनाहरूमा कारबाही गरिएको हो। गुठी संस्थानसँग समन्वय गरी गरिएको सो कारबाहीमा महानगरका नगरप्रहरी टोली सहभागी थिए।
नगरप्रहरी प्रमुख राजु पाण्डेले भने, “गुठीसँग समन्वय गरेर कार्यान्वयन गरेका हौं। ती संरचना नक्साविना बनेका अवैध हुन्।” उनका अनुसार महानगरले नियमित रूपमा सहरभित्रका अतिक्रमित क्षेत्र र नक्साविनाका संरचनामाथि कारबाही गर्दै आएको छ।
थापाथली क्षेत्रमा गरिएको यो कारबाहीलाई महानगरले अवैध निर्माणविरुद्धको निरन्तर अभियानको हिस्सा बताएको छ। यसअघि पनि महानगरले कुपण्डोल, गौशाला, कलंकी लगायतका क्षेत्रमा यस्तै डोजर अभियान सञ्चालन गरेको थियो।
