उपल्लो मुस्ताङमा गएरातिदेखि निरन्तर हिउँ वर्षा सुरु भएको छ। कार्तिक १० गते रातिदेखि परेको वर्षासँगै मुक्तिनाथ, घमी, छुसाङ, चराङ लगायत उच्च हिमाली क्षेत्र सेताम्य भएका छन्।
जिल्ला प्रहरी कार्यालय मुस्ताङका अनुसार हिमपातका कारण केही ठाउँमा बाटो चिप्लो बनेको र यात्रा गर्नेहरूलाई विशेष सतर्कता अपनाउन आग्रह गरिएको छ। प्रहरीका अनुसार हालसम्म ठूलो क्षतिको खबर प्राप्त नभए पनि हावाहुरी र हिमपातका कारण जनजीवन प्रभावित हुन थालेको छ।
स्थानीय बासिन्दाका अनुसार रातिदेखिको वर्षा बिहानसम्म हिउँमा परिणत भएपछि खेतबारी र घरका छानामा बाक्लो हिउँ थिचिएको छ। पर्यटक क्षेत्र मुक्तिनाथमा हिउँले दृश्य सुन्दर बनेको भए पनि यात्रुहरूलाई आवतजावतमा कठिनाइ भएको छ।
प्रहरीले यात्रा आवश्यक परेमा मात्र गर्ने र मौसम सामान्य नहुन्जेलसम्म उच्च क्षेत्रमा नजाने सुझाव दिएको छ।
