राष्ट्रिय स्वतन्त्र पार्टी (रास्वपा)ले विवेकशील साझा पार्टीले अघि सारेको एकीकरण प्रस्तावलाई औपचारिक रूपमा अनुमोदन गरेको छ। केन्द्रीय समितिको विशेष बैठकले सर्वसम्मत रूपमा प्रस्ताव स्वीकार गर्दै भोलि मंसिर १४ गते आइतबार राष्ट्रिय सभागृहमा भव्य एकता घोषणासभा गर्ने निर्णय गरेको हो।
रास्वपाका प्रवक्ता मनिष झाले जानकारी दिएअनुसार एकता प्रक्रियालाई संस्थागत रूपमा अगाडि बढाउन पार्टीले आन्तरिक तयारी पूरा गरिसकेको छ। उनका अनुसार परिवर्तनकामी, सुशासनमुखी र जिम्मेवार राजनीतिक शक्तिहरूसँग सहकार्यलाई सुदृढ बनाउने रणनीतिअनुसार यो कदम उठाइएको हो।
बैठकले आगामी दिनमा असल शासन, पारदर्शिता र समुन्नतिको अभियानलाई लक्षित गर्दै समान विचार राख्ने राजनीतिक समूहहरूसँग मुद्दागत र संगठनात्मक तहमा सहकार्य विस्तार गर्ने निर्णय पनि गरेको छ। यसका लागि केन्द्रीय समितिको निर्देशनअनुसार पार्टी सचिवालयले गठन गरेको ‘संघीय नेतृत्व मञ्च’लाई आधिकारिक स्वीकृति प्रदान गरिएको झले बताए।
रास्वपा र विवेकशीलबीचको एकता घोषणाले समसामयिक राजनीतिक परिवेशमा नयाँ विकल्प खोजिरहेकाहरूको चासो बढाएको छ। भोलिको सभागृहमा हुने कार्यक्रमले दुवै दलको संयुक्त भविष्यको खाका पनि सार्वजनिक गर्ने अपेक्षा गरिएको छ।
