आइसिसी टी–२० विश्वकपअन्तर्गत आज नेपालले इटालीसँग प्रतिस्पर्धा गर्दैछ। खेल मुम्बईको वानखेडे रंगशालामा दिउँसो ३ः१५ बजे सुरु हुनेछ।
दुवै टोली प्रतियोगिताको दोस्रो खेल खेल्दै छन्। पहिलो खेलमा नेपाल इंग्ल्यान्डसँग ४ रनले पराजित भएको थियो। इटाली भने स्कटल्याण्डसँग ७३ रनले पराजित भएको थियो। समूह ‘सी’ मा सुपर–८ पुग्ने सम्भावना कायम राख्न दुवैका लागि आजको खेल महत्वपूर्ण मानिएको छ।
टी–२० फर्म्याटमा नेपाल र इटालीबीच पहिलोपटक प्रतिस्पर्धा हुन लागेको हो। यसअघि ५० ओभरको खेलमा तीन पटक भेट हुँदा नेपालले सबै खेल जितेको थियो। दुवै टोलीबीच पछिल्लो भेट सन् २०१३ मा भएको थियो।
नेपालका लागि ओपनर कुशल भुर्तेल र आसिफ शेख प्रमुख रन–स्रोत मानिएका छन्। कप्तान रोहित पौडेल, दीपेन्द्रसिंह ऐरी, लोकेश बम, सन्दीप लामिछाने, करण केसी, नन्दन यादव र शेर मल्ल टोलीका मुख्य खेलाडी हुन्। डेथ ओभरमा बलिङ नियन्त्रण सुधार गर्नुपर्ने पक्ष देखिएको छ।
इटाली पहिलोपटक विश्वकप खेलिरहेको छ।
