नेपाली कांग्रेस का सभापति गगनकुमार थापा ले अबको पाँच वर्षभित्र मुलुकलाई भ्रष्टाचारमुक्त बनाउने प्रतिबद्धता व्यक्त गरेका छन्।
काठमाडौँको राष्ट्रिय सभागृहमा आयोजित ‘हाम्रो प्रतिज्ञा, तपाईँको प्रश्न’ नामक कार्यक्रमलाई सम्बोधन गर्दै उनले भ्रष्टाचारमा मुछिएका व्यक्तिको नाता वा पद हेरेर संरक्षण नगर्ने स्पष्ट पारे।
“कांग्रेसले यी कुरा गर्दै गर्दा भ्रष्टाचारमा मुछिएका व्यक्तिको नाता र नेता हेर्दैन। जोसुकै होस्, सभापति होस् वा कुनै पदमा रहेको व्यक्ति, यदि भ्रष्टाचार गरेको पाइए सार्वजनिक पदमा बस्ने अधिकार हुँदैन,” उनले भने।
सभापति थापाले २०४७ सालयताका जुनसुकै पार्टीका नेतामाथि पनि भ्रष्टाचार छानबिन गरिने बताए। उनले कार्यालय केन्द्रित होइन, नागरिक केन्द्रित सेवा प्रणाली विकास गर्नुपर्नेमा जोड दिए।
कुनै सेवा कति समयमा सम्पन्न हुन्छ भन्ने स्पष्ट समयसीमा तोक्नुपर्ने र तोकिएको समयभित्र सेवा नदिए नागरिकलाई क्षतिपूर्ति दिने व्यवस्था गरिने उनले बताए। “सार्वजनिक सेवामा एक दिनमा हुने भनिएको काम एकै दिनमा हुनुपर्छ,” उनले भने।
डिजिटल सार्वजनिक सेवा सातै दिन २४सै घण्टा उपलब्ध गराउने तथा सेवामा ढिलासुस्ती भए नागरिकलाई क्षतिपूर्ति दिने योजना कांग्रेसले अघि सारेको उनले जानकारी दिए।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
