प्रतिनिधिसभा सदस्य निर्वाचनको जारी मतगणनामा राष्ट्रिय स्वतन्त्र पार्टी (रास्वपा) हालसम्म ११९ क्षेत्रमा विजयी भएको छ।
आज साँझ ५ बजेसम्म सार्वजनिक भएको परिणामअनुसार रास्वपाका उम्मेदवारहरू थप ६ निर्वाचन क्षेत्रमा अग्रता लिइरहेका छन्।
निर्वाचन आयोगका अनुसार हालसम्म १५५ स्थानको मतगणना सार्वजनिक भएको छ। तीमध्ये नेपाली कांग्रेसले १७ क्षेत्रमा जित हासिल गरेको छ।
त्यस्तै, नेकपा (एमाले) सात स्थानमा विजयी भएको छ भने ३ स्थानमा अग्रता लिइरहेको छ।
आयोगका अनुसार नेपाली कम्युनिष्ट पार्टी (नेकपा)का तर्फबाट हालसम्म ७ उम्मेदवार विजयी भएका छन्। यस्तै श्रम संस्कृति पार्टीका ३ उम्मेदवार विजयी भएका छन्। राष्ट्रिय प्रजातन्त्र पार्टी (राप्रपा) र एक स्वतन्त्र उम्मेदवार एक–एक स्थानमा विजयी भएका छन्।
समानुपातिकतर्फ प्रतिनिधिसभा सदस्यको फागुन २१ गते सम्पन्न निर्वाचनको मतगणना पनि जारी छ। हालसम्म ४५ लाख ३० हजार ९१३ मत गणना सम्पन्न भएको छ।
त्यसमध्ये रास्वपाले २२ लाख ३९ हजार ८७० मत प्राप्त गरेको छ। नेपाली कांग्रेसले ७ लाख ६० हजार ४८५ मत प्राप्त गरेको छ भने नेकपा (एमाले) ले ६ लाख ४६ हजार ७७० मत पाएको छ।
त्यस्तै नेकपाले ३ लाख ४ हजार ६२ मत प्राप्त गरेको छ। राप्रपाले १ लाख ६३ हजार १५१ मत पाएको छ भने श्रम संस्कृति पार्टीले १ लाख ७ हजार ३२ मत प्राप्त गरेको छ।
