निर्वाचन आयोगले फागुन २१ गते सम्पन्न प्रतिनिधिसभा सदस्य निर्वाचनका सम्पूर्ण कार्य चैतको पहिलो साताभित्र सकिने जनाएको छ।
आयोगका प्रवक्ता नारायणप्रसाद भट्टराई ले चैतको पहिलो साताभित्र समानुपातिकतर्फ निर्वाचित हुने उम्मेदवारलाई प्रमाणपत्र दिने लगायतका सबै काम सम्पन्न हुने जानकारी दिएका हुन्। उनका अनुसार मंगलबारसम्म समानुपातिकतर्फको सबै मतगणना सकिने अनुमान गरिएको छ।
मतगणना सम्पन्न भएपछि खसेको सदर मतको प्रतिशतका आधारमा सम्बन्धित दलले पाएको मतको अनुपातअनुसार समानुपातिक बन्द सूचीबाट छनोट हुने उम्मेदवारको नामावली सम्बन्धित दलसँग माग गरिने आयोगले जनाएको छ।
दलबाट प्राप्त नामहरूलाई क्लस्टरअनुसार रुजु गर्दै निर्वाचित सदस्यहरूको अन्तिम छनोट गरिने र त्यसपछि आयोगले प्रमाणपत्र प्रदान गर्ने प्रवक्ता भट्टराईले बताए।
आयोगका अनुसार प्रत्यक्षतर्फ निर्वाचित भएका उम्मेदवारहरूलाई भने सम्बन्धित निर्वाचन अधिकृतको कार्यालयबाट नै प्रमाणपत्र प्रदान गरिसकिएको छ।
यस निर्वाचनमा प्रत्यक्ष र समानुपातिक दुवै प्रणालीतर्फ राष्ट्रिय स्वतन्त्र पार्टी को अग्रता रहेको बताइएको छ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
