फागुन २१ गते सम्पन्न प्रतिनिधिसभा सदस्य निर्वाचन अन्तर्गत समानुपातिकतर्फको मतगणना अन्तिम चरणमा पुगेको छ। मंगलबार साँझसम्म एक करोड पाँच लाख ८३ हजार ३८७ मत गणना सम्पन्न भएको छ।
निर्वाचन आयोग का अनुसार हालसम्मको मतपरिणामअनुसार यसपटक ६ वटा दल राष्ट्रिय दलको रूपमा स्थापित हुने निश्चित देखिएको छ।
पछिल्लो मतगणना अनुसार राष्ट्रिय स्वतन्त्र पार्टी पहिलो स्थानमा रहेको छ। दोस्रो स्थानमा नेपाली कांग्रेस, तेस्रोमा नेकपा एमाले र चौथो स्थानमा नेपाली कम्युनिस्ट पार्टी रहेका छन्।
यसैगरी पाँचौँ स्थानमा श्रम संस्कृति पार्टी र छैटौँ स्थानमा राष्ट्रिय प्रजातन्त्र पार्टी रहेका छन्। यी दलहरूले राष्ट्रिय दलको मान्यता प्राप्त गर्ने निश्चित भएको निर्वाचन आयोगले जनाएको छ।
राजनीतिक दल सम्बन्धी ऐन, २०७३ को दफा ५२ अनुसार प्रतिनिधिसभा निर्वाचनमा समानुपातिक प्रणालीतर्फ कम्तीमा तीन प्रतिशत मत र प्रत्यक्षतर्फ कम्तीमा एक सिट जित्ने दलले मात्र राष्ट्रिय दलको मान्यता प्राप्त गर्न सक्छ।
निर्वाचन आयोगका सहसचिव तथा प्रवक्ता नारायणप्रसाद भट्टराई का अनुसार सो कानुनी व्यवस्था पूरा गरेका कारण यी ६ दलले राष्ट्रिय दलको मान्यता प्राप्त गर्ने भएका हुन्।
निर्वाचन आयोगको पछिल्लो विवरण अनुसार हालसम्म कुल एक करोड सात लाख ३० हजार ५५१ मत गणना भइसकेको छ।
पछिल्लो नतिजाअनुसार राष्ट्रिय स्वतन्त्र पार्टीले ५१ लाख ३५ हजार ६२१ मत प्राप्त गरेको छ। नेपाली कांग्रेसले १७ लाख ४७ हजार ७३७ मत प्राप्त गर्दै दोस्रो स्थानमा रहेको छ भने नेकपा एमालेले १४ लाख ४८ हजार ३१८ मतसहित तेस्रो स्थानमा रहेको छ।
यसैगरी नेपाली कम्युनिस्ट पार्टीले ८ लाख २ हजार ७४३ मत प्राप्त गर्दै चौथो स्थानमा देखिएको छ। श्रम संस्कृति पार्टीले ३ लाख ७८ हजार ४७८ मत प्राप्त गरेको छ भने राष्ट्रिय प्रजातन्त्र पार्टीले ३ लाख २९ हजार १९७ मत प्राप्त गरेको छ।
